बने कीमत म लेवत हें गांववासी, मनरेगा मजदूर अउ जरूरतमंद लोगन मन
मुंगेली 30 अप्रैल 2020// नोवेल कोरोना वायरस के संक्रमण के रोकथाम अउ बचाव बर लागू तालाबंदी (लाॅकडाउन) के विषम परिस्थिति म राष्ट्रीय ग्रामीण आजीविका मिशन बिहान ले जुडे़ स्व-सहायता समूह के बहनी मन जीवन रक्षक मेडिकल कीट जैसे मास्क, सेनेटाइजर, हैण्ड- ग्लब्स, साबुन आदि सामान तैयार करके बांटत हें ।कोरोना वायरस के संक्रमण ले जनता ल बचाय के सार्थक प्रयास करत हें। 
जिला के 39 स्व-सहायता समूह के 50 बहनी मन द्वारा अब तक 33 हजार 673 नग रियूजेबल काटन कपडा के मास्क अउ दो स्व-सहायता समूह के 6 बहनी मन के द्वारा पांच सौ हाथ के ग्लब्स बनाके पुलिस विभाग अउ पुलिस पेट्रोलिंग टीम, कलेक्ट्रेट, जिला पंचायत, जनपद पंचायत, नगर पालिका, नगर पंचायत के अधिकारी-कर्मचारि अउ जरूरतमंद लोगन मन ल किफायती दर म उपलब्ध कराय गिस । बताय जावत् हे कि 39 स्व-सहायता समूह के 50 बहनी मन द्वारा रोज 200-300 मास्क अउ दो स्व-सहायता समूह के 6 बहनी मन रोज 30-40 ग्लब्स बनावत हें। जेहा सुरक्षा के दृष्टिकोण ले उपयोगी हावय।
राष्ट्रीय ग्रामीण आजीविका मिशन बिहान के स्व-सहायता समूह ह प्रकृति ल सुरक्षित रखे खातिर बीना काम वाले चीज ले वाटरप्रूफ जूता कवर बूट तैयार करत हें। जेखर उपयोग स्वच्छता कर्मचारि मन बड़े स्तर म इस्तेमाल करत हावयं। अइसने पी.पी पालीथीन शूट घलोक बनाय जावत हे। जेखर उपयोग आपातकालीन स्थिति म सुरक्षा बर एम्बुलेस वाहन चालक विशेष रूप ले करत हावयं। ये सामान मन ल राष्ट्रीय ग्रामीण आजीविका मिशन बिहान के अंतर्गत स्व-सहायता समूह के बहनी मन स्वयं उत्पादित सामान ल रिटेल बाजार, सुपर मार्केट म रखे गे हे। गांव के मनखे मेर अब तक 58 लाख 50 हजार 514 रूपया के राशि के वितरण करे हें । वैश्विक महामारी के संकट काल म मुंगेली जिला के स्व-सहायता समूह के बहनी मन के ये काम सच म प्रेरणा दायक हे।
मुंगेली ले गुरतुर गोठ बर दिलीप बसंत
