मुंगेली 13 मई 2020// आन राज अउ बाहर ले अवइया श्रमिक मजदूर के जानकारी बर जिला के सीमावर्ती क्षेत्र बैतलपुर म घलो चेक पोस्ट (बैरियर) के स्थापना करे गे हे। कलेक्टर डाॅ. सर्वेश्वर नरेंद्र भुरे अउ जिला के पुलिस अधीक्षक श्री डी. श्रवण ह बीते दिन बैतलपुर चेक पोस्ट (बैरियर) के औंचक निरीक्षण करे रहिंन अउ चेक पोस्ट (बैरियर) ले गुजरैया श्रमिक खातिर जरुरी व्यवस्था के साथ-साथ श्रमिक सहायता केंद्र के बैनर लगाय बर पथरिया अनुभाग के अनुविभागीय अधिकारी राजस्व श्री ब्रजेश सिंह क्षत्रिय ल निर्देश दिये रहिंन। एखर परिपालन म श्री क्षत्रिय ह चेक पोस्ट (बैरियर) मे श्रमिक सहायता केंद्र के बैनर अउ चेक पोस्ट (बैरियर) ले गुजरैया श्रमिक बर भोजन, पेयजल, दवाई, कूलर अउ आराम करे के व्यवस्था सरस्वती शिशु मंदिर स्कूल के बरामदा मे करे हें। कल तक चेक पोस्ट (बैरियर) ले 213 श्रमिक ल निःशुल्क भोजन कराय गिस । भोजन के बाद श्रमिक मन कूलर के ठंडी हवा म आराम करिन अउ जिला प्रशासन के व्यवस्था बर मुक्त कंठ ले सराहना करत रवाना होइन । ऐ बखत म सरगांव के नायब तहसीलदार श्री दिलीप खांडे घलो मौजूद रहिन।
मुंगेली ले दिलीप बसंत
