लइका ल वाॅल पेंटिग, अनौपचारिक शिक्षा अउ राज्य शासन द्वारा तैयार करे फिलिम दिखाय जावत हे
‘सजग कार्यक्रम अउ ‘चकमक अभियान घलोक सुरु
मुंगेली 1 मई 2020// नोवेल कोरोना वायरस संक्रमण के रोकथाम अउ बचाव खातिर जिला म संचालित सब्बो आंगनबाडी केंद्र ल बंद करे गे हे। जेखर कारण आंगनबाडी केंद्र के लइकामन दाई ददा संग अपन घर म समय बितावत हें। मुख्यमंत्री श्री भूपेश बघेल के सार्थक पहल म आंगनबाडी केंद्र के लइकामन म मया, दुलार, स्नेह अउ अपनापन जगाय खातिर डिजिटल प्लान के शुरूआत करे गे हे। ये अभियान के शुरूआत युनिसेफ के सहयोग ले करे गे हे। जिला महिला अउ बाल विकास विभाग के जिला कार्यक्रम अधिकारी श्री राजेन्द्र कश्यप ह बताइन कि आंगनबाडी केंद्र के लइकामन बर युनिसेफ के सहयोग ले शुरू करे गे हे डिजिटल प्लान के सब्बो कार्यक्रम डिजिटल मोड म हावय। वर्तमान म सजग अभियान के माध्यम ले लइका अउ अभिभाव ल प्रेरित करके अपनापन, स्नेह, दुलार सहहृदयता जगा के कोरोना से उपजे तनाव अउ विचलन ल सामान्य करे के प्रयास करे जावत हे। तकि लइका मन के दुनिया अभिभावक म समा सके। ओमन बताइन कि सजग अभियान म लइकामन ल वाॅल पेंटिग, अनौपचारिक शिक्षा अउ राज्य शासन द्वारा तैयार फिलिम दिखाय जावत हे। लइका मन ल आकर्षक विडियो आधारित छत्तीसगढ़ी बाल गीत अउ अन्य गतिविधि आंगनबाडी कार्यकर्ता के माध्यम से कराय जावत हे, जेहा लइका मन ल आकर्षित करत हें । ऐसन दई ददा जेखर पास एन्ड्राइड फोन नई ये ओमन ल घर म भेंट करके मोबाईल के माध्यम ले लइका के सामने कई गतिविधि के प्रदर्शन करे जावत हे। राज्य शासन के निर्देश म हितग्राहि महिला अउ पंजीकृत लइकामन ल आंगनबाडी कार्यकर्ता द्वारा सूखा राशन घलो दे जात हे।
मुंगेली लु गुरतुर गोठ बर दिलीप बसंत
