मुंगेली, 11 जुलाई 2024। छत्तीसगढ़वासी मन ल अयोध्या धाम के यात्रा के सुविधा प्रदान करे खातिर विष्णुदेव साय सरकार कोति ले ‘‘श्रीरामलला दर्शन योजना’’ चलाए जात हे। ए योजना के तहत तीर्थ यात्री मन ल अयोध्या म रामलला के दर्शन कराए जात हे। इही क्रम म मुंगेली जिला म जिला कलेक्टर श्री राहुल देव ह 64 यात्री मन के दल ह हरी झंडी देखा के रवाना करिन। बस म सवार ये तीर्थयात्री मुंगेली ले बिलासपुर रेलवे स्टेशन जाके उहां ले विशेष ट्रेन से अयोध्या बर प्रस्थान करिन। कलेक्टर श्री देव ह तीर्थयात्री मन ले मुलाकात करके कुशल क्षेम पूछीन अऊ ओ मन ल माला पहिरा के यात्रा बर शुभकामना दीन।
ए बेरा म तीर्थ यात्री मन म खासा उत्साह नजर आइस। बस म बइठे महिला-पुरूष तीर्थ यात्री जय श्री राम के नारा लगात अयोध्या धाम बर रवाना होइन। उत्साहित यात्री मन ह प्रसन्नता जाहिर करत सरकार के ए पहल बर धन्यवाद ज्ञापित करिन। लोरमी विकासखंड के पीपरखुंटी गांव के पंडित शिवकुमार पांडे ह बताइस कि शासन कोति ले शुरू करे गए श्रीरामलला दर्शन योजना के अंतर्गत अयोध्या धाम के यात्रा करना मोर बर सौभाग्य के विसय हे। हम सबो ए यात्रा बर अड़बड़ उत्साहित हन। अइसनहे मुंगेली विकासखंड के ग्राम केशरुवाडीह के पिल्लूराम साहू ह बताइस कि सरकार के ए अनूठा पहल ले हमला अयोध्या म श्रीरामलला दर्शन के सौभाग्य मिलइया हे। उमन एखर बर शासन-प्रशासन ल धन्यवाद दीन।
ए तीर्थ यात्री मन ल दू बस के माध्यम ले बिलासपुर रेल्वे स्टेशन तक भेजे गीस। उहां ले सबो स्पेशल ट्रेन के माध्यम ले अयोध्या धाम बर रवाना होइन। ए सबो तीर्थ यात्री मन ल रद्दा म खाए पीए, अयोध्या म ठहरे अऊ दर्शन के बाद वापस घर तक निःशुल्क पहुंचाए जाही। तीर्थ यात्रा के समय दू कर्मचारी देखरेख बर लगाए गे हे। ए अवसर म संबंधित अधिकारी-कर्मचारी, जनप्रतिनिधि एवं गणमान्य नागरिक मौजूद रहिन।
