मुंगेली, 10 फरवरी 2024। उप मुख्यमंत्री श्री अरुण साव के निर्देश म मुंगेली जिला के लोरमी विकासखंड के ग्राम देवरहट म पानी टंकी (उच्च स्तरीय जलागार) के निर्माण के काम तेजी ले शुरू हो गए हे। पाछू दिन म एक कार्यक्रम म सामिल होए देवरहट पहुंचे उप मुख्यमंत्री अऊ लोक स्वास्थ्य यांत्रिकी मंत्री श्री साव ले गांव वाले मन ह पानी टंकी के निर्माण म लेट-लतीफी के शिकायत मिले रहिस। श्री साव ह एला गंभीरता ले लेत तुरंते कार्यस्थल के निरीक्षण करके लोक स्वास्थ्य यांत्रिकी विभाग के अधिकारी मन ल पूर्ण गुणवत्ता के संग पानी टंकी के निर्माण समय-सीमा म पूरा करे के निर्देश देहे रहिन। ऊंखर निर्देश के बाद विभाग ह तुरंते पानी टंकी के निर्माण पूरा करे खातिर तेजी ले काम चालू कर देहे गए हे।
उप मुख्यमंत्री श्री अरुण साव ह कार्यस्थल के निरीक्षण करके संबंधित अधिकारी मन ले कहे रहिन कि जल जीवन मिशन शासन के महत्वाकांक्षी योजना ये। ये मां कोनो प्रकार के लापरवाही बर्दाश्त नइ करे जाए। लोक स्वास्थ्य यांत्रिकी विभाग के कार्यपालन अभियंता ह बताइस कि उप मुख्यमंत्री के निर्देश के बाद उच्च स्तरीय जलागार के निर्माण काम तेज गति ले शुरू कर दे गए हे। एकर काम लउहे पूरा कर ले जाही।
कार्यपालन अभियंता ह बताइस कि देवरहट म हर घर तक शुद्ध अऊ सुरक्षित पेयजल पहुंचाए बर करीब एक करोड़ 45 लाख रुपए के लागत ले उच्च स्तरीय जलागार बनाए जात हे। एखर निर्माण ले गांव के 437 परिवार ल स्वच्छ पेयजल के लाभ मिलही। उप मुख्यमंत्री श्री साव के निर्देश म तेजी से एकर निर्माण पूरा करे जात हे।
उप मुख्यमंत्री श्री अरुण साव के निर्देश के बाद पानी टंकी के निर्माण म आईस तेजी
