कोरोना संक्रमण के आपात स्थिति म चुनौति के सामना करे खातिर जिला प्रशासन द्वारा करे गिस मॉकड्रिल

मुंगेली 05 मई 2020// नोवेल कोरोना वायरस (कोविड-19) केे संक्रमण के मद्देनजर आपात स्थिति म चुनौति के सामना करे म हमन कतक सक्षम हंन, एला देखे बर जिला प्रशासन मुंगेली ह कठोर अनुशासनात्मक रूप म आज माॅकड्रिल करे गिस । माॅकड्रिल जिला मुख्यालय स्थित नगर पालिका परिषद मुंगेली के वार्ड क्रमांक 12 ठक्कर बापा वार्ड नवापारा म बिहनिया 11 बजे ले गोपनीय रूप से करे गिस। वार्ड क्रमांक 12 म एक मनखे के आर. डी. टेस्ट म काल्पनिक कोरोना पाॅजिटिव के आधार म कोरोना फाइटर्स टीम ले जुडे़ अधिकारी-कर्मचारि मन तत्परता पूर्वक कार्यवाही करत मनखे ल स्वास्थ्य विभाग अउ पुलिस विभाग के विशेष सुरक्षा घेरा म लेके डेडिकेटेड संजीवनी 108 एम्बुलेंस द्वारा कोविड-19 हाॅस्पिटल (एक्सक्यूलसिव ट्रीटमेंट केयर हाॅस्पिटल- ETCH) लेजाय गिस। जिला पंचायत के मुख्यकार्यपालन अधिकारी श्रीमति नुपूर राशि पन्ना ह बताइन कि नोवेल कोरोना वायरस (कोविड-19) के संक्रमण ले बचाव अउ रोकथाम खातिर जिला प्रशासन कतका संजीदा, सतर्क अउ सचेत हे, एखर जमीनी हकीकत के पता लगाय बर आज माॅकड्रिल करे गिस । कोरोना वायरस ल लेके जिला म गठित विभिन्न टीम ह तुरते काम करिन । एखर से ये बात सिद्ध होवत हे कि कलेक्टर अउ जिला दंडाधिकारी डाॅ. सर्वेश्वर नरेंद्र भुरे के अगवाई म नोवेल कोरोना वायरस (कोविड-19) के संक्रमण ले बचाव अउ रोकथाम बर बनाय टीम कोनो भी स्थिति म अपन जिम्मेदारी के निर्वहन करे में सक्षम हावय। माॅकड्रिल के समय म मुंगेली अनुभाग के अनुविभागीय अधिकारी राजस्व श्री चित्रकांत चार्ली ठाकुर, डाॅ. कमलेश खैरवार, डी.पी.एम. श्री उत्कर्ष तिवारी, मुंगेली तहसीलदार श्री अमित सिंहा, जनपद पंचायत मुंगेली के मुख्य कार्य पालन अधिकारी श्री आर एस नायक, डाॅ. रविशंकर देवांगन, बी.डब्लू एम. श्री मनीष गुप्ता सहित राजस्व पुलिस अउ स्वास्थ्य विभाग के अधिकारी-कर्मचारी रहिंन।

मुंगेली ले गुरतुर गोठ बर दिलीप बसंत