हेलन केलर ल ऊंखर जन्मदिन म देहीं संगीतमय श्रद्धांजलि
रायपुर, 26 जून 2020। दृष्टिहीन, मूकबधिर मनखे मन अऊ मानवता के सेवा बर अपन जीवन समर्पित कर देवइया हेलन केलर के जन्म दिन 27 जून के दिन छत्तीसगढ़ के एकमात्र दिव्यांग महाविद्यालय के विद्यार्थी ओ मन ल संगीतमय श्रद्धांजलि देहीं। एखर बर ये विद्यार्थी मन राष्ट्रीय स्तर म दिव्यांग मन बर आयोजित ऑनलाईन संगीत प्रतियोगिता म हिस्सा लेके अपन प्रतिभा के प्रदर्शन करहीं। अमेरिका म जन्मे नेत्रहीन अऊ मूकबधिर हेलन केलर ह पूरा दुनिया ल बताइस के शरीर के अपंगता कोनो मनखे के पढ़ाई-लिखाई, बोले अऊ खेले म बाधक नइ बन सकय। वोखर लेख अऊ रचना मन ह कई दिव्यांग मन ल हौसला अऊ प्रेरणा देहे हे।
समाज कल्याण विभाग कोति ले दिव्यांग पढ़ईया लईका मन ल शिक्षा के संग प्लेटफार्म उपलब्ध कराए के लगातार प्रयास करे जात हे। संगीत साधना म लगे दिव्यांग पढ़ईया लईका मन ल मुख्यधारा म लाके आत्मनिर्भर बनाए के कई प्रयास विभाग कोति ले करे जात हे। समाज कल्याण विभाग कोति ले संचालित स्कूल म शिक्षा प्राप्त ‘मोर रायपुर‘ थीम सांग प्रस्तुत करइया बालिका मन एकर उदाहरण हें। राज्य के अकतहा कई राष्ट्रीय प्रतियोगिता अऊ सांस्कृतिक कार्यक्रम मन के माध्यम ले पढ़ईया लईका मन ल आगू लाय के काम विभाग ह करत हे। इही कड़ी म विद्यार्थी हेलन केलर दिवस म राष्ट्रीय लेवल के ऑनलाइन संगीत प्रतियोगिता म भाग लेहीं। भारत के सबो दिव्यांग पढ़ईया लईका मन बर ये प्रतियोगिता आयोजित करे जात हे। प्रतियोगिता म राजधानी रायपुर के दिव्यांग महाविद्यालय के विद्यार्थी सुश्री रानू साहू, सुश्री गायत्री वर्मा, श्री पंचराम नेताम, श्री अनिल मंडावी, श्री चंद्रशेखर साहू, श्री दुष्यंत कुमार साहू, सुश्री अमलेश्वरी दर्रो अऊ श्री हरीश चौहान भाग लेहीं। ये सबो मन महाविद्यालय म विधिवत गायन अऊ वादन के शिक्षा ग्रहण करत हें।
