रायगढ, 22 अगस्त 2021। रायगढ़ जिला के महिला आरक्षक अंजना सहिस के मामला अब तूल पकड़े लगे हे। भाजपा ह ये मुद्दा ल अपन फेसबुक पेज म पोस्ट करे हे ते मुताबिक नेता ओपी चौधरी ह ये पूरा मामला के न्यायिक जांच करे के मांग करे हे।
भारतीय जनता पार्टी के प्रदेश मंत्री ओपी चौधरी ह पुलिस मुख्यालय म पदस्थ महिला आरक्षक के रहस्यमय तरीका ले गायब होए के घटना उपर सवाल उठात न्यायिक जांच के मांग करे हें। उमन भूपेश सरकार ले पूछे हें के पाछू नौ महीना ले महिला आरक्षक गायब हे फेर, पुलिस विभाग ह अब तक मामला ल संज्ञान म काबर नइ लेहे हे? ड्यूटी म अनुपस्थित आरक्षक के स्थायी पता म कोनो सूचना या नोटिस काबर नइ भेजे गए हे।
जेन सीआईडी म राज्य के गूढ़ मसला हल करे के जिम्मेदारी हे वो खुदे अपनेच सहकर्मी के मामला म सुते काबर हे? अइसन का हे के आरक्षक के माँ के आवेदन के बाद घलोक पुलिस सिरिफ गुमशुदगी के मामला दर्ज करके हाँथ म हाँथ धरे बइठे हे। आखिर आरक्षक अंजना सहिस के संग अइसन का होए हे जेन ल प्रदेश के पुलिस लुकाना चाहत हे।
जानबा हे के रायगढ़ म कई साल तक आरक्षक के पद म तैनात अंजना सहिस के रायपुर पुलिस मुख्यालय तबादला होए रहिस जिहां ओला सीआईडी म तैनात करे गए रहिस। ड्यूटी के बेरा म अचानक वो ह लापता हो गए रहिस। पुलिस के कहना हे के ओ ह तीन महीना के छुट्टी के आवेदन दे रहिस। चौधरी ह अकचकात कहिस के ये तो अचरज के विसय हे के अपनेच विभाग के महिला सहकर्मी के अफसर मन ह नौ महीना तक कोनो सुध नइ लीन। ये बेरा अऊ बाढ़ गए रहितिस रहिस कहूं महिला आरक्षक के माँ पुलिस म आवेदन दे के मीडिया तीर नइ जातिस। पुलिस ह अभी तक कोनो प्रारंभिक जांच तक शुरू नइ करे हे। न तो महिला आरक्षक के मोबाइल के आखरी लोकेशन ट्रेस करे गए हे अऊ न वोकर सहकर्मि मन ले पूछताछ होए हे जिंकर संग वो आखरी बार देखे गए रहिस।
ओपी चौधरी ह कहे हे के पूरा मामला जेन रहस्मय हालात कोति इशारा करत हे वो पुलिस के भूमिका उपर संदेह पैदा करे बर काफी हे। पुलिस हेडक्वाटर म पदस्थ महिला आरक्षक के अइसे लापता होए के घटना कोनो अइसने घटना नो हे। मामला के कई ठन पहलु मन ले जांच के आवश्कता हे। श्री चौधरी ह प्रकरण के न्यायिक जांच के मांग भूपेश सरकार ले करे हें।
9 महीना ले रहस्यमय तरीका ले लापता सीआईडी के महिला आरक्षक के मामला गरमाइस
