मुख्यमंत्री ह गमगीन माहौल म शहीद जवान मन ल श्रद्धांजलि अर्पित करिन
मुख्यमंत्री ह साहस अऊ जज्बा के सराहना करके बढ़ाइन जवान मन के मनोबल
गृहमंत्री, वनमंत्री, विधायक अऊ राज्य शासन के वरिष्ठ अधिकारी मन ह घलोक करनपुर के 201 कोबरा सीआरपीएफ कैंप म दीन श्रद्धांजलि
शहीद जवान मन के पार्थिव शरीर, गृह ग्राम बर रवाना
रायपुर, 31 जनवरी 2024। मुख्यमंत्री श्री विष्णुदेव साय ह आज बस्तर जिला के करनपुर स्थित 201 कोबरा सीआरपीएफ कैंप पहुंचके उहां टेकलगुड़ेम गांव म (थाना जगरगुण्डा जिला सुकमा) नक्सल मुठभेड़ म शहीद जवान मन के पार्थिव शरीर म पुष्पचक्र अर्पित करके ओ मन ल श्रद्धांजलि दीन। उमन 201 कोबरा बटालियन के जवान मन ले मुलाकात करके ऊंखर साहस अऊ जज्बा के सराहना करत जवान मन के मनोबल बढ़ाइन।
िबकट गमगीन माहौल म टेकलगुड़ेम गांव म नक्सली मुठभेड़ म शहीद जवान मन स्वर्गीय श्री देवेन सी., स्वर्गीय श्री पवन कुमार अऊ स्वर्गीय श्री लम्बाधर सिंघा ल श्रद्धांजलि अर्पित करिन। उप मुख्यमंत्री अउ गृहमंत्री श्री विजय शर्मा, वन मंत्री श्री केदार कश्यप, चित्रकोट के विधायक श्री विनायक गोयल, बस्तर के विधायक श्री लखेश्वर बघेल, जगदलपुर के महापौर सफीरा साहू, पूर्व विधायक संतोष बाफना, डीजीपी श्री अशोक जुनेजा, एडीजी नक्सल ऑपरेशन श्री विवेकानंद सिन्हा, कमिश्नर श्री श्याम धावड़े, आईजी श्री सुन्दरराज पी. संग आन जनप्रतिनिधि मन ह घलोक शहीद मन ल श्रद्धांजलि अर्पित करिन।
शहीद मन ल श्रद्धांजलि देहे के बाद ऊंखर पार्थिव शरीर ऊंखर गृह ग्राम बर रवाना करे गीस। एमां 201 कोबरा सीआरपीएफ बटालियन के शहीद जवान श्री देवेन सी. के पार्थिव शरीर ग्राम मोटूर जिला वेल्लूर तमिलनाडू, शहीद श्री पवन कुमार के पार्थिव शरीर ग्राम कुपावली जिला भिंड़ मध्यप्रदेश अऊ 150 वीं बटालियन के शहीद जवान श्री लम्बाधर सिंघा ग्राम काकरागांव जिला चिंटांग असम बर रवाना करे गीस।
मुख्यमंत्री ह शहीद मन के परिजन के प्रति संवेदना प्रकट करत कहिन कि फोर्स के लगातार आगू बढ़त जाय अऊ पहुंचविहीन इलाका मन म घलोक कैम्प लगाय ले माओवादी आतंकी बौखला गे हें। मुख्यमंत्री ह कहिन कि हम हर स्थिति म अपन जवान मन के संग मजबूती ले खड़े हन। सुरक्षा बल के जवान सर्चिंग म निकले रहिन। माओवादी आतंकी मन ह घात लगाके हमला करिन। हमार जवान मन ह ऊंखर हमला के मुंहतोड़ जवाब दीन।
मुख्यमंत्री ह कहिन कि छत्तीसगढ़ म नक्सली मन के विरूद्ध लड़ाई तेज हो गए हे। माओवादी आतंक ले आम नागरिक मन ल सुरक्षा प्रदान करे, मनखे मन तक योजना मन के लाभ पहुंचाए बर सुरक्षा बल मन के जवान प्रभावी कार्यवाही करत हें। हमार जवान नक्सली चुनौती के बहादुरी के संग मुकाबला करत हें।