- ऑनलाइन नाम निर्देशन व्यवस्था स्थापित करइया गिनेचुने राज्य मन म छत्तीसगढ़ घलोक
- उप जिला निर्वाचन अधिकारी मन अऊ मास्टर्स ट्रेनर्स के प्रशिक्षण बैठक आयोजित
रायपुर, लउहे होवईया नगरीय निकाय मन के चुनाव म पार्षद पद के उम्मीदवार मन अब ऑनलाइन नाम निर्देशन पत्र भर सकही। ऑनलाइन सॉफ्टवेयर ओनो (ONNO) के माध्यम ले नाम निर्देशन पत्र पाए के व्यवस्था करइया राज्य मन म अब छत्तीसगढ़ घलोक सामिल हो गए हे। ऑनलाइन नाम निर्देशन पत्र भरे अऊ निर्वाचन ले जुड़े आन जरूरी विषय मन के जानकारी देहे बर आज रायपुर म जिला मन के उप जिला निर्वाचन अधिकारी मन अऊ मास्टर्स ट्रेनर्स के प्रशिक्षण के आयोजन करे गीस। प्रशिक्षण म राज्य निर्वाचन आयुक्त ठाकुर रामसिंह अऊ राज्य निर्वाचन आयोग के वरिष्ठ अधिकारी उपस्थित रहिन।
प्रशिक्षण म राज्य निर्वाचन आयुक्त श्री ठाकुर ह कहिन कि ये सॉफ्टवेयर ले रिटर्निंग अधिकारी संबंधित उम्मीदवार के नाम निर्देशन पत्र पहिलिच ऑनलाइन देखके प्रारम्भिक जांच कर सकही । एखर से आखरी तारीक ल जादा संख्या म अवइया नाम निर्देशन पत्र के सेती होवइया कठिनाई ले बचे जा सकही । उमन निर्देश दीन कि नाम निर्देशन पत्र भरे म कोनो असुविधा झन होवय एखर बर जिला म स्थित लोक सेवा केंद्र , जोन कार्यालय , नगर निगम , नगर पालिका अऊ आन सुविधाजनक स्थान मन म कंप्यूटर के संग डाटा एंट्री ऑपरेटर के व्यवस्था कराए के निर्देश देहे गए हे।
प्रशिक्षण के समय नगरपालिका नियम मन म हालेच म होए संशोधन मन के जानकारी देवत वइसनहे चुनाव प्रक्रिया संचालित करे के जानकारी दिए गीस। प्रशिक्षण के समय पार्षद पद बर निर्वाचन व्यय सीमा तय होए के सेती अभ्यर्थि मन के व्यय लेखा के जांच बर निर्वाचक व्यय संपरीक्षक के नियुक्ति अऊ ऊंखर काम मन के संबंध म घलोक जानकारी दिए गीस।