नगरी के दुबराज ल मिलिस जापान मं अंतरराष्ट्रीय सम्मान, महिला स्व-सहायता समूह के काम के होवत हे बड़का सरहाना

CHHATTISGARHI NEWS: धमतरी, छत्तीसगढ़ के सुगंधित धान ‘नगरी दुबराज’ ह अब देश के सीमा लांघ के जापान के राजधानी टोक्यो तक अपन महमहई बगरावत हे। धमतरी जिला के नगरी विकासखंड के अंतर्गत आमाझरिया अउ तीर-तखार के महिला स्व-सहायता समूह के मेहनत रंग लाए हे, जेन ह ए धान के टोक्यो मं प्रदर्शन के जरिये अंतरराष्ट्रीय मंच मं नवा कीर्तिमान स्थापित करे हे। ए उपलब्धि ले न सिर्फ महिला मन के आर्थिक सशक्तीकरण होवत हे, बल्कि समूचा राज्य के नाम गूंजे हे। महिला मन के ए सफलता ले प्रेरित हो के कृषि विभाग के उप संचालक श्री राजेश कुमार मेहरा ह ओमन ल बधाई देहे हें अउ उखर उत्कृष्ट काम के बड़का सरहाना करे हें।
नगरी दुबराज के टोक्यो तक के ए सफर के पाछू महिला स्व-सहायता समूह के कठिन तपस्या अउ समर्पण जुड़े हे। महिला मन के ए समूह ह सिर्फ धान के खेती भर नइ करिन, बल्कि ओकर मूल्यवर्धन मने वैल्यू एडीशन के ऊपर घलव खास ध्यान दीन। उमन चाउंर ल साफ-सुथरा ढंग ले पॉलिश अउ ग्रेडिंग करके ओखर स्वाद अउ गुणवत्ता ल बढ़ा के ओला विदेशी बाजार बर तियार करिन। कृषि विभाग के मार्गदर्शन अउ तकनीकी सहयोग के बदौलत आज ए महिला मन के ए उत्पाद ह टोक्यो जइसे बड़का शहर मं अपन छाप छोड़त हे। जापान के उपभोक्ता मन ह नगरी दुबराज के विशेष स्वाद अउ महक के बड़ तारीफ करिन। ए सफलता ले ग्रामीण क्षेत्र के महिला मन ल कृषि आधारित उद्योग के क्षेत्र मं आगू बढ़े के नवा प्रेरणा मिले हे, अउ ओखर जिनगी मं आत्मनिर्भरता के नवा बिहान आए हे। समूचा धमतरी अउ छत्तीसगढ़ मं ए बात ल लेके खुसियाली हे।