घाट म रेती भरत ट्रैक्टर ट्राली ल नायब तहसीलदार ह पकड़िस, चालक नई पेश कर पाइस दस्तावेज

कोरबा, 16 अक्टूबर 2020। हसदेव नदी के भैंसामुड़ा घाट ले अवैध रूप ले रेती खोद के भरत ट्रैक्टर-ट्राॅली ल बरपाली के नायब तहसीलदार पंचराम सलामे ह गुरुवार के घाट म ही जब्त करिन। नायब तहसीलदार सलामे ह अवैध रेती खनन-परिवहन करत ट्रैक्टर चालक ले रेती उत्खनन, परिवहन अउ ट्रैक्टर ट्राॅली के पंजीयन आदि के दस्तावेज मन के जानकारी मांगिन। जांच के बेरा नायब तहसीलदार ह रेती के राॅयल्टी पर्ची आदि के बारे म घलो पूछिस। ट्रैक्टर-ट्राॅली म कोनो भी तरह के कोई पंजीयन नंबर अंकित नई रिहिस। चालक मउका म रेती अउ वाहन ले संबंधित कोनो दस्तावेज प्रस्तुत नई कर पाइस। कोनो भी तरह के दस्तावेज प्रस्तुत नई करे म जांच के बाद ट्राॅली म भरे रेती के अवैध परिवहन सिद्ध होए म नायब तहसीलदार ह ओला जब्त कर लिस। छत्तीसगढ़ गौण खनिज नियमावली 1966 के तहत कार्रवाई करिन। ट्रैक्टर ल उरगा थाना म पुलिस अभिरक्षा म रखे गए हे।