- स्कूल के नजदीक शराब दुकान मन ल तुरंते शिफ्ट करे के दीन निर्देश
- बारिश म शहर म जल भराव झन हो, एखर बर करे जाय माकूल इंतजाम
- गौठान मन म मवेशी मन बर चारा-पानी के होए हे बनेच व्यवस्था
- प्रभारी मंत्री अवइया दिनन म खुद करहीं कार्यालय मन के औचक निरीक्षण
- रायपुर जिला के प्रभारी मंत्री श्री चौबे ह जिला स्तरीय अधिकारी मन के लीन समीक्षा बैठक
रायपुर, छत्तीसगढ़ शासन के कृषि अउ जैव प्रौद्योगिकी, जल संसाधन मंत्री अऊ रायपुर जिला के प्रभारी मंत्री श्री रविन्द्र चौबे ह कहिन हे कि किसान मन ल नकली खाद, बीज अऊ दवा बेचइया उपर कड़ी कार्रवाई करे जाय। ये सबसे बड़े जुर्म हे। किसान मन ल सहकारी समिति मन ले खाद-बीज अऊ ऋण लेहे म कोनो परेशानी झन होवय एकर विशेष ध्यान रखे जाय। प्रभारी मंत्री श्री चौबे आज इहां रायपुर जिला कलेक्टोरेट परिसर स्थित रेडक्रॉस सभाकक्ष म पहली बैठक लेके जिला के अधिकारी मन ल शासन के मंशानुरूप अऊ क्षेत्र के जनप्रतिनिधि मन के संग विकास कार्य मन ल अमलीजामा पहिनाए ल कहिन ताकि शासन के जनकल्याणकारी योजना मन के समुचित लाभ जनता ल मिल सकय।
प्रभारी मंत्री श्री चौबे ह कहिन कि रायपुर राजधानी के जिला हे अऊ ओखर जइसे अधिकारी मन ल इहां पदस्थ करे गए हे। ए जिला ल हर क्षेत्र म एक मिशाल पेश करना चाही ताकि प्रदेश के आन जिला एकर अनुसरण कर सकयं। प्रभारी मंत्री ह बैठक म बरसा के पहिलील के तैयारी मन के समीक्षा करत कहिन कि कोनो स्थिति म शहर म जल भराव के स्थिति निर्मित नइ होनी चाही, एखर बर नरवा अऊ नाली मन के नियमित रूप ले सफाई के संगेच पानी निकासी बर सबो जरूरी इंतजाम सुनिश्चित करे जाय। उमन कहिन कि स्कूल मन तीर शराब दुकान नइ होना चाही कहूं हे तो ओला तुरंते आन जगा शिफ्ट करे जाए। श्री चौबे ह राज्य सरकार के महात्वांकाक्षी सुराजी गांव योजना के तहत नरवा, गरवा, घुरूवा अऊ बाड़ी के करे जा काम मन के समीक्षा करत कहिन कि गौठान मन म मवेशी मन बर बनेच चारा अऊ पानी के इंतजाम होवय, रायपुर शहर म घूमइया मवेशि मन बर जगा के चयन करके जरूरी व्यवस्था सुनिश्चत करे जाए। बारिश के जल संग्रहण बर वॉटर हार्वेस्टिंग के काम प्राथमिकता ले होवय। मनखे प्लास्टिक के उपयोग झन करयं एखर बर समूह मन के माध्यम ले वैकल्पिक व्यवस्था सुनिश्चित करे जाय। मनखे मन ल समय म पेंशन अऊ स्कूली लइका मन ल पाठ्य पुस्तक अउ गणवेश वितरित होवय।
प्रभारी मंत्री श्री चौबे ह कहिन कि सबो अधिकारी अपन निरधारित दिवस अऊ समय म कार्यालय मन म अनिवार्य रूप ले उपस्थित रहयं ताकि मनखे मन ल काम बर भटकना झन परय। राजस्व कार्यालय मन म लंबित बटवारा, सीमांकन अऊ नामांकन के प्रकरण मन के समय म निराकरण सुनिश्चित होवय। प्रभारी मंत्री ह कहिन कि अवइया दिनन म ओ मन खुद कार्यालय मन के औचक निरीक्षण करके लंबित आवेदन मन के समीक्षा करहीं। कलेक्टर डॉ. एस. भारतीदासन ह जिला म संचालित विकास कार्य मन के जानकारी दीन अऊ उमन कहिन कि प्रभारी मंत्री महोदय कोति ले देहे गे निर्देश मन के जइसे जिला म विकास कार्य मन ल गति प्रदान करे जाही।
बैठक म रायपुर दक्षिण के विधायक श्री बृजमोहन अग्रवाल, रायपुर ग्रामीण के विधायक श्री सत्यनारायण शर्मा, अभनपुर के विधायक श्री धनेन्द्र साहू, रायपुर नगर निगम के महापौर श्री प्रमोद दुबे, रायपुर उत्तर के विधायक श्री कुलदीप जुनेजा, रायपुर पश्चिम के विधायक श्री विकास उपाध्याय, धरसींवा के विधायक श्रीमती अनिता योगेन्द्र शर्मा, जिला पंचायत के अध्यक्ष श्रीमती शारदा देवी वर्मा, नगर निगम के आयुक्त श्री शिव अनंत तायल, जिला पंचायत के मुख्य कार्यपालन अधिकारी डॉ. गौरव कुमार सिंह संग सबो जिला स्तरीय अधिकारी उपस्थित रहिन।
