नमो ड्रोन दीदी आरती साहू: ड्रोन ले पूरा होईस आत्मनिर्भरता के सपना

बलौदाबाजार, जिला के विकासखंड सिमगा के गांव रानीजरौद के आरती साहू आज नमो ड्रोन दीदी योजना के माध्यम ले आत्मनिर्भरता के नवा मिसाल पेश करत हे। पाछू दू बछर ले आरती ड्रोन के जरिया ले किसान मन के खेत म नैनो यूरिया अउ नैनो डीएपी के छिड़काव करत हे। प्रति एकड़ 300 रूपिया के दर ले सेवा देके ओ ह न केवल किसान मन के समय अउ मिहनत बचावत हे, बल्कि खुद घलो आर्थिक रूप ले मजबूत होके लखपति दीदी बने के रद्दा म आगू बढ़त हे।
आरती साहू बताथे के पउर साल ओ ह लगभग 1154 एकड़ रकबा म ड्रोन के माध्यम ले नैनो खाद के छिड़काव करे रहिस, जेकर से ओ ल लगभग साढ़े तीन लाख रूपिया के आमदनी होईस। ओकर बर ड्रोन अब सिरिफ खेती-किसानी म आधुनिक तकनीक के साधन भर नइ हे, बल्कि आत्मनिर्भरता अउ आर्थिक मजबूती के माध्यम बन गे हे। तकनीक ले जुड़के आरती ह ये साबित कर देहे हे के मौका अउ सही मार्गदर्शन मिलय त गांव के माई-लोगन मन घलो नवा तकनीक ल अपनाके अपन परिवार के आर्थिक दशा ल मजबूत कर सकथें।
आरती साहू प्रधानमंत्री श्री नरेंद्र मोदी अउ मुख्यमंत्री श्री विष्णुदेव साय के हिरदे ले आभार जतावत कहिथें के नमो ड्रोन दीदी योजना ह महिला मन ल आत्मनिर्भर होके आगू बढ़े के मौका देहे हे। आज ओमन ड्रोन के माध्यम ले खेत म दवई-खातू के छिड़काव करके अपन आमदनी बढ़ावत हें अउ आत्मविश्वास के संग अपन गोड़ म ठाढ़ होत हें। आरती के ये कहानी गांव के माई-लोगन मन बर प्रेरणा आय के आधुनिक तकनीक ल अपनाके ओमन घलो रोजगार के नवा मौका ले जुड़ सकथें अउ आत्मनिर्भरता के नवा उड़ान भर सकथें।