जिला के किसान आधुनिक तकनीक ले होवत हें लाभान्वित

नमो ड्रोन दीदी योजना ले अब तक 2200 एकड़ म करे गीस छिड़काव
बलौदाबाजार-भाटापारा, जिला के किसान समुदाय खेती-किसानी म आधुनिक तकनीक अपनावत हें। इही कड़ी म नमो ड्रोन दीदी योजना के अंतर्गत किसान मन ल ड्रोन तकनीक उपलब्ध कराए गए हे, जेखर माध्यम ले अब तक खरीफ 2025 म लगभग 2200 एकड़ क्षेत्र म तरल उर्वरक अऊ कीटनाशक मन के छिड़काव करे जा चुके हे।
अभी हाल म जिला के सबो विकासखंड मन म कुल 6 ड्रोन संचालित हे। प्रशिक्षित ड्रोन पायलट मन के माध्यम ले धान के फसल म नैनो यूरिया, नैनो डीएपी, कीटनाशक दवा अऊ आन तरल कृषि उत्पाद मन के प्रभावी ढंग ले छिड़काव करे जात हे। ड्रोन तकनीक ले मात्र 10 लीटर पानी के उपयोग करत 7 ले 10 मिनट म एक एकड़ क्षेत्र म छिड़काव संभव हो जात हे। ए पद्धति ले किसान मन के समय अऊ जल दुनों के बचत होवत हे अऊ पौधा मन म उत्पाद के असर घलोक जादा प्रभावशाली होवत हे। परिणामस्वरूप किसान मन के रुचि ड्रोन आधारित खेती कोति बढ़त हे।
उप संचालक कृषि श्री दीपक नायक ह बताइस के केन्द्र सरकार कोति ले उपलब्ध कराए जात नैनो यूरिया अऊ नैनो डीएपी पारंपरिक उर्वरक मनके तुलना म जादा प्रभावी हे। ये उत्पाद नैनो तकनीक ले बने हे तेखर सेती फसल मन म लउहे असर देखाथे, संगेच परिवहन अऊ भंडारण म घलोक सरल हे। पारंपरिक यूरिया अऊ डीएपी के एक बोरी के जगा म एक-एक बोतल नैनो यूरिया अऊ नैनो डीएपी के उपयोग करके किसान लाभ प्राप्त कर सकत हें। अभी हाल म धान फसल बर नैनो यूरिया के छिड़काव बहुत लाभकारी हे। उमन ये घलोक बताइन के नैनो उर्वरक के उपयोग ले नइ केवल फसल मन के उत्पादकता बाढ़त हे, बल्कि रासायनिक उर्वरक मन उपर शासन कोति ले देहे जाय वाले भारी अनुदान के वित्तीय बोझ म घलोक कमी आवत हे। नैनो उर्वरक मृदा स्वास्थ्य खातिर घलोक हितकारी सिद्ध होवत हे।