नमो ड्रोन दीदी योजना: किसान मन के बेरा अऊ पइसा दुनो के होवत हे बचत, किसानी म आधुनिक तकनीक के होवत हे उपयोग

CHHATTISGARHI NEWS: मुंगेली, छत्तीसगढ़ म किसानी ल आधुनिक बनाय अऊ किसानी ल अउ ज्यादा सरल बनाय बर केंद्र अऊ राज्य सरकार के संघरा उदीम ले चलत ‘नमो ड्रोन दीदी योजना’ ह ग्रामीण इलाकामन म एक बड़का बदलाव लावत हे। ए योजना के तहत महिला स्व-सहायता समूह के दीदीमन ल ड्रोन संचालन के प्रशिक्षण देके प्रशिक्षित करे जात हे, जेन मन खेत-खेत जाके आधुनिक ड्रोन के जरिए खाद, कीटनाशक अऊ दवा के छिड़काव के काम करत हें।
ए आधुनिक तकनीक के अपनाए ले किसानमन के समय अऊ पइसा दुनो के बड़का बचत होत हे। पारंपरिक तरीका ले छिड़काव करे म जिहाँ एक कोती ज्यादा समय लगय अऊ मजदूर मन के कमी के सामना करना परय, उहें ड्रोन के उपयोग ले कम समय म पूरा खेत म एक समान रूप ले छिड़काव हो जात हे। एखर से न सिरिफ फसल के सुरक्षा बेहतर ढंग ले होवत हे, बल्कि लागत म घलो कमी आवत हे।
‘नमो ड्रोन दीदी योजना’ के जरिए एक कोति खेती किसानी के काम आसान होगे हे, उहें दूसर कोति गांव के महिलामन ल रोजगार के नवा अऊ सम्मानजनक अवसर मिलत हे, जेन ओमन ल आर्थिक रूप से आत्मनिर्भर बनावत हे। ए पहल ले कृषि म तकनीक के उपयोग बाढ़े के संगे-संग ग्रामीण अर्थव्यवस्था ल एक नवा गति मिलत हे। नमो ड्रोन दीदी मन के ए सराहनीय काम पूरा प्रदेश के किसान अऊ महिलामन बर प्रेरणा के बानगी पेस करत हे, जेन आधुनिक छत्तीसगढ़ के निर्माण म मील के पत्थर साबित होत हे।