प्रगतिशील किसान पुरेंद्र कुमार यादव ह अपनाइन आधुनकि तकनीक, धान के खेती म मिलिस गजब के परिणाम
दुर्ग, किसानी म आधुनकि तकनीक मन के बाढ़त उपयोग किसान मन के कमाई अउ पैदावार म बने बदलाव लावत हे। दुर्ग जिला के ग्राम डूंडेरा के प्रगतिशील किसान श्री पुरेंद्र कुमार यादव एकर एक प्रेरणादायक मिसाल बनके आगू आए हें। उमन धान के खेती म नैनो डीएपी अउ नैनो यूरिया के उपयोग करके सिरिफ उत्पादन म ही सुधार नई पाए हें, बल्कि खेती के खरचा म घलो बड़ कमी दरज करे हें।
पौधा मन के बाढ़ अउ उत्पादन के गुनवत्ता म होईस सुग्घर सुधार
श्री यादव ह बताइन के किसानी विभाग के रद्दा देखाए म उमन अपन फसल म नैनो खातू मन के प्रयोग करिन। एकर फलसरूप फसल ला संतुलित अउ असरदार पोसन मिलिस, जेकर से पौधा मन के बाढ़ अउ बने होईस अउ उत्पादन के गुनवत्ता म घलो सुग्घर सुधार देखे बर मिलिस। ओकर मुताबिक नैनो खातू के उपयोग से फसल अउ जादा निरोग अउ पोठ दिखिस, जेकर सोझ लाभ पैदावार ऊपर घलो परिस।
नैनो डीएपी अउ यूरिया के उपयोग जादा सुग्घर अउ ससता
उमन बताइन के परम्परागत बोरा बंद खातू मन के तुलना म नैनो डीएपी अउ नैनो यूरिया के उपयोग जादा सुग्घर अउ ससता साबित होईस। थोरकेच मात्रा म उपयोग होवइया ए खातू मन से फसल ला जरूरी पोसक तत्व सही ढंग से मिलिस, जेकर से खातू के खरचा म कमी आईस। संगेच लाए-ले जाए, रखे अउ मजदूरी के खरचा म घलो बचत होईस।
नैनो खातू खेती ला टिकाऊ अउ नफा वाले बनाए के रद्दा म जरूरी
धान के फसल म सोच ले जादा बने परिणाम मिले ले श्री यादव ह बड़ उत्साहित हें। ओकर मानना हे के नैनो खातू खेती ला अउ जादा वैज्ञानिक, टिकाऊ अउ नफा वाले बनाए के रद्दा म बड़का भूमिका निभावत हे। वोहा दूसर किसान मन ला घलो नवा तकनीक मन ला अपनाए अउ खेती म नवा तौर-तरीका अपनाए बर प्रेरित करत हें।
किसान मन बर बिस्वासी संगी साबित होही
श्री पुरेंद्र कुमार यादव ह कहिथें, “नैनो डीएपी अउ नैनो यूरिया अवइया समे म किसान मन बर बिस्वासी संगी साबित होही। एकर से खेती के खरचा कम होथे, फसल ला अउ बने पोसन मिलथे अउ उत्पादन बढ़ाए म मदद मिलथे। मैं जम्मो किसान भाई मन से अरजी करत हंव के उमन घलो ए उन्नत खातू मन के उपयोग करंय अउ एकर लाभ पावंय।
किसान मन ला कम लागत म बने उत्पादन अउ जादा नफा
बता दन के कृषि विभाग कोति ले किसान मन ला नैनो खातू मन के उपयोग बर सरलग जागरूक करे जात हे। जिला म एकर बढ़त उपयोग के संग किसान मन ला कम लागत म अउ बने उत्पादन अउ जादा नफा मिलत हे। ए उदीम ह खेती ला पर्यावरन के अनुकूल, संशाधन ला बचइया अउ जादा लाभकारी बनाए के रद्दा म एक जरूरी कदम साबित होवत हे।
