अम्बिकापुर जिला म समूह के महिला मन बर गोठान बनिस आजीविका केन्द्र

आत्मनिर्भर बने आयस्टर मशरूम उत्पादन के तैयारी

अम्बिकापुर, राज्य शासन के महत्वकांक्षी योजना नरवा, गरवा, घुरूवा अऊ बाड़ी पशुधन के संरक्षण अऊ संवर्धन म महत्वपूर्ण भूमिका निभाए के संगेच महिला सशक्तिकरण ल घलोक मजबूत करत हे। कलेक्टर डॉ. सारांश मित्तर के मार्गदर्शन अउ जिला पंचायत के मुख्य कार्यपालन अधिकारी श्री कुलदीप शर्मा के नेतृत्व म अम्बिकापुर जनपद के ग्राम सरगवा के गोठान म आयस्टर मशरूम के उत्पादन ले महिला समूह ल जोड़के आजीविका ल सशक्त करे बर प्रोत्साहित करे जात हे। ग्राम पंचायत सरगवां के महेश्वरी स्व सहायता समूह कोति ले मशरूम उत्पादन बर शेड के निर्माण करके कैरी बैग म मशरूम बीज डालके मशरूम उत्पादन के तैयारी करे जात हे। एखर संगेच गोठान म वर्मी कम्पोस्‍ट खाद अउ सब्जी के पैदावार करके आजीविका केन्द्र के रूप मे विकसित करे जात हे।

महेश्वरी स्व सहायता समूह के अध्यक्ष श्रीमती राखी यादव ह बताइस कि गोठान म शेड के निर्माण करके वोमा मशरूम के उत्पादन करे जात हे। शेड म 500 कैरी बैग मशरूम उत्पादन बर लगाए जात हे। हरेक कैरी बैग म 100 ग्राम बीज डाले जात हे जेमां भूसा के संग 5 लेयर म पैक करके तियार करे जात हे। कैरी बैग के अनुमानित लागत 30 ले 35 रूपिया आथे। समूह के सदस्य श्रीमती सुखमनिया ह बताइस कि मशरूम के उत्पादन बीज डाले के 20 ले 25 दिन म चालू हो जाथे। वो ह बताइस कि मशरूम उत्पादन के व्यवसाय कम समय अउ लागत म जादा मुनाफा देने वाला हे। मशरूम उत्पादन ले हम अपन जीवन स्तर ल ऊंचा उठा सकथन।