किसान मन के सिंचाई सुविधा बढ़ाए बर सरलग होवत हे काम: कृषि अऊ जल संसाधन मंत्री श्री रवींद्र चौबे

दुर्ग, 08 मार्च 2021। किसान मन बर सिंचाई सुविधा बढ़ाए के दिशा म हम सरलग काम करत हन। खेती किसानी ल बढ़ावा देहे बर सरकार बाना उंचाए हे अऊ किसान मन के हित म बहुत अकन योजना शासन ह सुरू करे हे। ये बात कृषि अऊ जलसंसाधन मंत्री श्री रवींद्र चौबे ह कहिन। ओ मन नवागांव पुरदा म एनीकट कम कासवे के भूमिपूजन के अवसर म गांव वाले मन ल संबोधित करत रहिन। एकर निर्माण 3 करोड़ 82 लाख रुपए के लागत ले होना हे। ये बेरा म कृषि मंत्री ह कहिन कि मुख्यमंत्री श्री भूपेश बघेल के नेतृत्व म छत्तीसगढ़ शासन कोति ले निरंतर कृषि हित म योजना बनाए गए हे एकर सीधा असर कृषि म नजर आवत हे। कर्जमाफी होए ले अऊ धान खरीदी के उचित मूल्य मिले ले किसान खेती कोति वापस लहुटे हें। एकर प्रमाण ये साल होए रिकार्ड धान खरीदी म दिखत हे। राजीव गाँधी किसान न्याय योजना के माध्यम ले किसान मन ल राशि अइसे समय म देहे गीस जब ओ मन ल कृषि काम बर एखर विशेष जरूरत रहिस। कृषि मंत्री ह ये बेरा म हितग्राही मन ल सामान वितरण घलोक करिन। ये मौका म जनप्रतिनिधि अऊ अधिकारीगण मौजूद रहिन। कृषि मंत्री ह दनिया उदवहन सिंचाई योजना के घलोक भूमिपूजन करिन, एखर लागत 7 करोड़ 71 लाख रुपिया हे।