नरवा प्रोजेक्ट म लेहे के सेती कुछु दिक्कत नइ होइस, मोटर पंप लगाके लेवत हें भरपूर पानी
दुर्ग, मुख्यमंत्री श्री भूपेश बघेल के नरवा योजना के जादू जइसे असर ग्रामीण क्षेत्र मन म दिखे लगे हे। ये फोटू छाटा ले आए हे। छाटा म ये पइत पानी कम गिरे हे। छाटाच नही तीर-तखार के अड़बड़ अकन ग्रामीण क्षेत्र मन म खंड वर्षा होए। छाटा नरवा प्रोजेक्ट म रहिस ते पाए के इहां एकर कोनो असर नइ होइस अऊ खेत मन बर किसान मन तीर भरपूर पानी के व्यवस्था होगे। छाटा के किसान देवेंद्र पटेल ह बताइस कि ये इलाका म खंड वर्षा होए हे कहूं पानी गिरिस कहूं नइ गिरिस। शासन ह नरवा योजना म चेक डेम बना देहे हे अऊ नाला ले गाद निकलवा देहे हे, ते पाए के पानी ठहर गे अऊ हमार खेत मन ल पानी के संजीवनी मिल गे। गांव के किसान पुनीत ह बताइस कि 19 जून के बनेच बरसा होइस अऊ एखर से ही चेक डेम म बनेच पानी आ गे। चेक डेम नइ बने रहितिस त पूरा पानी बोहा जातिस। नरवा के काम होए ले आसपास के खेत मन म नमी घलोक भरपूर मात्रा म हे अऊ भूमिगत जल के स्तर अच्छा बढ़े ले किसान मन ल लाभ होए हे। जून ले अगस्त तक चार पइत वर्षा के पानी रोके गए हे अऊ 172 एकड़ खेत मन म सिंचाई होवईया हे। ये सिंचाई मोटर पंप के माध्यम ले होवत हे। एखर अलावा भूमिगत जल के रिसाव नाला के माध्यम ले अच्छा होए ले जेन खेत मन म बोर हे उहां घलोक अच्छा पानी आवत हे। पहिली ये नरवा म पानी के प्रवाह फरवरी तक ही होत रहिस अब अपरेल तक ये मा पानी रहिथे। एखर से दुनों फसले लेहे बर रद्दा खुल गए हे। जिला पंचायत सीईओ श्री अश्विनी देवांगन ह बताइस कि अभी कलेक्टर श्री पुष्पेंद्र मीणा के संग नरवा योजना के किनारे के गांव मन के निरीक्षण करे गए रहिस अऊ सबो म भूमिगत जल के स्तर काफी उठे हे ये देखे गीस। ये बात म किसान अड़बड़ खुश हे। खंड वर्षा के होवइया दुष्प्रभाव ले किसान बांच गें अऊ अब तक बर्बाद होवइया पानी अब सुरक्षित रहे लगे हे।
