डेढ़ सैकड़ा अबूझमाड़िया नान्‍हें लईका मन महात्मा गांधी के भेस म पदयात्रा म होइन सामिल

नारायणपुर, नक्सल प्रभावित जिला नारायणपुर म गांधी जी के 150वां जयंती म आज आयोजित गांधी विचार पदयात्रा म पोटाकेबिन, देवगांव के 150 अबुझमाड़िया स्कूली लइका मन गांधी जी के वेशभूषा के संग पदयात्रा म सामिल होइन। आज जिला मुख्यालय म पदयात्रा के समापन अवसर म जिला प्रशासन कोति ले आयोजित ग्राम पंचायत माहका खेल मैदान ले इंडोर स्टेडियम माहका तक गांधी विचार पदयात्रा रैली निकाले गइस। जेमां मनखे मन ल गांधी जी के प्रेरणा दायी बात अउ स्वच्छता अउ सत्य, अहिंसा के संदेश दे गीस। गांधी जी के 150वां जयंती के अवसर म इंडोर स्टेडियम म ऊंखर जीवन ले जुड़े दुलर्भ फोटू अऊ प्रेरणादायी बात मन ल प्रदर्शित करे गीस। जेखर अवलोकन कलेक्टर संग जनप्रतिनिधि मन, गणमान्य नागरिक मन अऊ स्कूली लइका मन ह करिन। कार्यक्रम के सुरू म अतिथि मन ह गांधी जी के फोटू म माला पहिरा के उनला सुरता करिन।

आयोजित कार्यक्रम म स्थानीय कला जत्था से स्थानीय भाषा-बोली म नाटक प्रस्तुतिकरण के माध्यम ले गांधी जी के स्वच्छता संदेश अऊ सरकार के सुपोषण अभियान अऊ स्वास्थ्य योजना मन के लाभकारी संदेश देहे गीस। कार्यक्रम म मुख्य अतिथि जिला पंचायत अध्यक्ष श्रीमती प्रमिला उइके संबोधित करिस अऊ गांधी जी के विचार मन ल जीवन म उतारे के बात कहिस। रैली के आखर म सुपोषण अउ स्वच्छता रथ घलोक जागरूकता के संदेश देवत चलत रहिस। कार्यक्रम ल संगठन पदाधिकारी रजनु नेताम अऊ शिवकुमार पांडेय ह घलोक संबोधित करत गांधी जी के जीवन उपर प्रकाश डारिन। ए अवसर म मुख्य कार्यपालन अधिकारी जिला पंचायत श्री प्रेम कुमार पटेल, जिला शिक्षा अधिकारी गिरधर मरकाम, बीईओ श्री खेमेश्वर पाणीग्राही, संग विधायक प्रतिनिधी श्री प्रमोद नेलवाल, श्री पंडीराम वड्डे, क्षेत्र के जनप्रतिनिधी, गणमान्य नागरिक संग स्व सहायता समूह के महिला मन अउ बड़ संख्या म स्कूली लइका उपस्थित रहिन।

लउछरहा..