कलेक्टर श्री धर्मेश साहू ह गुलुमकोड़ो मल्टी एक्टीविटी सेंटर के करिन अवलोकन : समूह के महिला मन ले करिन बातचीत अऊ ऊंखर काम के लीन जानकारी

नारायणपुर, 12 फरवरी 2021। कलेक्टर श्री धर्मेश कुमार साहू ह नारायणपुर जिला के ग्राम पंचायत कुढ़ारगांव के आश्रित गांव गुलुमकोड़ो म महिला स्व सहायता समूह के महिला मन बर विकसित करे गए मल्टी एक्टीविटी सेंटर के अवलोकन करिन। ये बेरा म उमन महिला स्व सहायता समूह के महिला मन कोति ले तियार करे जात चप्पल मन ल देखिन, अऊ उंकर काम ल सहराईन। कलेक्टर श्री साहू ह समूह के महिला मन ल प्रोत्साहित करे बर ऊंखर कोति ले तियार करे गए चप्पल ल बिसाईन तको। उमन मल्टी एक्टीविटी सेंटर म काम करत महिला मन ले ऊंखर काम-काज, बाजार म मांग, सामान के उपलब्धता आदि के बारे म चर्चा करिन अऊ मन लगाके काम करे के समझाईश दीन। मुख्य कार्यपालन अधिकारी जिला पंचायत श्री राहुल देव ह जानकारी देवत बताइस कि शासन के मंशानुरूप ग्रामीण महिला मन ल आर्थिक रूप ले सक्षम बनाए के उद्देश्य ले स्व सहायता समूह के महिला मन ल चप्पल निर्माण, सिलाई अऊ प्रसंस्करण के प्रशिक्षण दे गए हे। अब कुढ़ारगांव के समूह के महिला मन ए सबो काम मन ले जुड के ये मल्टी एक्टीविटी सेंटर के जरिये अपन आर्थिक स्थिति ल मजबूत करहीं। उमन बताइन कि ये मल्टी एक्टीविटी सेंटर म चप्पल निर्माण, सिलाई अऊ ईमली के प्रसंस्करण करे के काम करे जाही, अमली ले अमली रोटी बनाए जाही।