नाबालिक लईका मन बेंचत हें नशा के दवई, पुलिस ह जपत करिस ऐविल अऊ रेक्सोजेसिक के सूजी

कोरिया, 04 सितम्‍बर 2021। कोरिया पुलिस अधीक्षक संतोष कुमार सिंह ह जिला के पुलिस मन ल अवैध कारोबारी मन के खिलाप अभियान के चला के कड़क कारवाही करे के हुकुम देहे हे। इही कड़ी म थाना चिरमिरी के एतराब म सरलग सट्टा, जुआ, दारू अऊ कबाड़ी के अवैध कारोबार करइया मन के खिलाप कारवाही करे गए हे। जानबा हे के पुलिस पेट्रोलिंग म मुखबिर ले सूचना मिलीस के टिकरापारा बड़े बाजार चिरमिरी के दू नाबालिक लइका अपन घर के तीर म नशा के सूजी बेंचत हें। खबर मितेच मुखबिर के बताए जगा म जाके दूनों लईका मन तीर ले मादक पदार्थ नशा के दवई 10-10 एम एल के एविल इंजेक्शन, 6 नग 60 एम एल अऊ रेक्सोजेसिक इंजेक्शन 5 नग कुल मात्रा 10 एम एल अऊ 3 नग डिस्पोजल सिरिंज, कुल कीमती करीब 4500 रूपिया जप्त करे गीस अऊ धारा 22 बी एनडीपीएस एक्ट के तहत अपराध दर्ज कर के दुनों लईका ल गिरपतार करके न्यायिक रिमांड म जी.जी.बोर्ड भेजे गए हे।