प्रधानमंत्री श्री नरेन्द्र मोदी ह आज राष्ट्रीय राजमार्ग ले संबंधित करीबन 6,400 करोड़ रूपिया के लागत के पांच परियोजना मन के लोकार्पण अऊ शिलान्यास करिन। जेन दो परियोजना मन के लोकार्पण करे गीस, ओमां जबलपुर-जगदलपुर राष्ट्रीय राजमार्ग के रायपुर-कोडेबोड़ खंड के 988 करोड़ रूपिया के लागत ले निर्मित 33 कि.मी. लंबी 4 लेन वाले सड़क अऊ एनएच-130 के बिलासपुर-अंबिकापुर खंड के 1261 करोड़ रूपिया के लागत ले निर्मित 53 किलोमीटर लंबा बिलासपुर-पथरापाली खंड म निर्मित 4-लेन के सड़क के लोकार्पण सामिल हे।
प्रधानमंत्री श्री मोदी ह 6-लेन वाले ग्रीनफील्ड रायपुर-विशाखापत्तनम कॉरिडोर के छत्तीसगढ़ खंड बर तीन राष्ट्रीय राजमार्ग परियोजना मन के आधारशिला रखिन। एमां – एनएच-130 सीडी म 1368 करोड़ रूपिया के लागत ले बनइया 43 किलोमीटर लंबा छै लेन वाले झांकी-सरगी खंड एनएच-130 सीडी म 1471 करोड़ रूपिया के लागत ले बनइया 57 किलोमीटर लंबा छै लेन वाले सरगी-बसनवाही खंड अऊ एनएच-130 सीडी म 1307 करोड़ रूपिया के लागत ले बनइया 25 किलोमीटर लंबा छे लेन वाले बसनवाही-मारंगपुरी खंड के विकास सामिल हे। 2.8 किलोमीटर लंबा 6-लेन सुरंग एकर एक प्रमुख घटक हे – उदंती वन्यजीव अभयारण्य क्षेत्र म वन्यजीव मन के आसान आवागमन बर 27 रद्दा अऊ 17 बंदर छतरी मन के निर्माण घलोक करे जाही।
अइसनहे प्रधानमंत्री श्री मोदी ह 750 करोड़ रूपिया के लागत ले निर्मित 103 किलोमीटर लंबा रायपुर-खरियार रोड रेल लाइन के दोहरीकरण, 290 करोड़ रूपिया के लागत ले विकसित केवटी-अंतागढ़ ल जोड़इया 17 किलोमीटर लंबा नवा रेलवे लाइन के लोकार्पण करिन अऊ हरी झंडी देखाके अंतागढ़ ले रायपुर नवा ट्रेन ल रवाना करिन। प्रधानमंत्री ह कोरबा म 130 करोड़ रूपिया ले जादा लागत ले निर्मित 1700 सिलेण्डर दैनिक क्षमता के इंडियन ऑयल कॉपोरेशन के एलपीजी बॉटलिंग प्लांट के लोकार्पण अऊ प्रधानमंत्री आयुष्मान भारत के लाभार्थि मन ल 75 लाख कार्ड के वितरण के शुभारंभ करिन।