अभियान बर 79156 करोड़ रूपिया के बजट प्रावधान
63 हजार ले जादा आदिवासी बहुल गांव अउ आकांक्षी जिला मन के आदिवासी गांव मन करे जाही सेचुरेटेड
छत्तीसगढ़ आदिम जाति कल्याण मंत्री श्री रामविचार नेताम ह प्रधानमंत्री के माना आभार
रायपुर, 21 सितमबर 2024/ प्रधानमंत्री श्री नरेन्द्र मोदी के अध्यक्षता मं होए बैठक मं केंद्रीय मंत्रिमंडल ह ‘प्रधानमंत्री जनजातीय उन्नत ग्राम अभियान‘ ल मंजूरी दे दे हे। ए अभियान के तहत आदिवासी बहुल गांव अउ आकांक्षी जिला मन मं आदिवासी परिवार ल सेचुरेट करे अउ आदिवासी समुदाय के सामाजिक-आर्थिक स्थिति मं सुधार बर 79,156 करोड़ रूपिया के बजट प्रावधान करे गये हे।
जेमां केन्द्र सरकार के 56,333 करोड़ रूपिया अउ राज्य सरकार के 22,823 करोड़ रूपिया के हिस्सा सामिल हे। ए अभियान के तहत लगभग 63 हजार गांव सामिल होही। जेमां पांच करोड़ ले जादा आदिवासी मनखे मन ल लाभ मिलही।
छत्तीसगढ़ के आदिम जाति, अनुसूचित जाति, आन पिछड़ा वर्ग अउ अल्प संख्यक विकास मंत्री श्री रामविचार नेताम ह एखर बर प्रधानमंत्री नरेन्द्र मोदी संग केन्द्रीय मंत्री परिषद के प्रति आभार व्यक्त करे हे। उमन कहिन के छत्तीसगढ़ के आबादी मं जनजाति के हिस्सा एक तिहाई हे। ए योजना के क्रियान्वयन ले आदिवासी बहुल गांव मन मं मूलभूत सुविधा बाढ़ही, जेखर ले मनखे मन के जीवन स्तर ल ऊपर उठाए मं मदद मिलही।
जनबा हे कि साल 2011 के जनगणना के मुताबिक भारत मं अनुसूचित जनजाति के जनसंख्या 10.45 करोड़ हे अउ देश भर मं 705 ले जादा आदिवासी समुदाय हे, जऊन दूरदराज अउ पहुंच ले दूर के क्षेत्र मन मं रहिथे। प्रधानमंत्री जनजातीय उन्नत ग्राम अभियान के उद्देश्य भारत सरकार के कई ठन योजना मन के माध्यम ले सामाजिक बुनियादी ढांचा, स्वास्थ्य, शिक्षा, आजीविका मं महत्वपूर्ण अंतराल ल भरना अउ पीएम जनमन के सीख अउ सफलता के आधार मं आदिवासी क्षेत्र मन अउ समुदाय के पूरा अउ सतत विकास सुनिश्चित करना हे।
