आस्था ह छुइस हिरदे ल : प्रधानमंत्री श्री नरेंद्र मोदी ले रामनामी समाज के प्रतिनिधि मन ह करिन आत्मीय भेंट

मुख्यमंत्री श्री विष्णुदेव साय ह सोशल मीडिया म साझा करिन ये भावनात्मक पल
रायपुर, प्रधानमंत्री श्री नरेंद्र मोदी अऊ रामनामी समाज के बीच आत्मीय गोठ-बात के एक वीडियो देश म तेजी ले वायरल होय हे। ए वीडियो ल अपन सोशल मीडिया एक्स म पोस्ट करत मुख्यमंत्री श्री विष्णुदेव साय ह एला भावनात्मक अऊ प्रेरणादायी पल बताए हें।
छत्तीसगढ़ राज्य स्थापना के रजत जयंती साल के अवसर म आयोजित रजत महोत्सव के समय एक हृदयस्पर्शी दृश्य ओ समय देखे ल मिलीस, जब रामनामी समाज के प्रतिनिधि मन ह माननीय प्रधानमंत्री श्री नरेंद्र मोदी ले आत्मीय भेंट करिन।
मुख्यमंत्री श्री विष्णु देव साय ह बताइन के प्रधानमंत्री जी के रायपुर प्रवास ले कुछेक घंटा पहिली मंत्रालय म रामनामी समुदाय के प्रतिनिधि मनले उंखर भेंट होए रहिस। उमन प्रधानमंत्री जी ले मिले के अपन प्रबल इच्छा व्यक्त करे रहिन, ते पाए के एखर बर जरूरी व्यवस्था ठउका करे गए रहिस।
मुख्यमंत्री श्री साय ह कहिन के जब रजत महोत्सव के समय रामनामी समुदाय के ये श्रद्धालु प्रधानमंत्री मन श्री मोदी ले मिलिन, तब उमन बड़ आदर अऊ प्रेम ले प्रधानमंत्री जी ल अपन पारंपरिक मोर मुकुट ले मुख्य मंच म अलंकृत करे के अभिलाषा प्रकट करिन। प्रधानमंत्री श्री मोदी ह जेन सहजता, स्नेह अऊ आत्मीय भाव ले ऊंखर ए अनुरोध ल स्वीकार करिन, वो क्षण उहां उपस्थित सबो मनखे मन खातिर बहुत भावनात्मक अऊ प्रेरणादायी बन गे।
मुख्यमंत्री ह कहिन के रामनाम ही जिंकर धर्म, रामभक्ति ही जिंकर कर्म – अइसन अद्भुत अऊ राममय रामनामी समाज के सदस्य मन के तन म अंकित ‘राम’ केवल एक नाव भर नइ हो, बल्कि समर्पण, तपस्या अऊ अटूट आस्था के चिनहारी ये। ये समुदाय अपन तन, मन अऊ जीवन ल प्रभु श्रीराम के चरण म अर्पित कर देहे हें — इही उंखर जीवन साधना हे।
मुख्यमंत्री श्री साय ह कहिन के माननीय प्रधानमंत्री श्री नरेंद्र मोदी जी के ए आत्मीयता म भक्ति अऊ कर्म के अद्वितीय संगम झलकथे। ये दृश्य ए सत्य ल पुष्ट करे हे के रामभक्ति केवल पूजा भर नो हे, बल्कि जीवन जीए के एक पवित्र साधना हे, जेन ल प्रधानमंत्री श्री मोदी ह अपन आचरण अऊ जीवन मूल्य ले सार्थक करिन।