वनांचल स्थित 10 गांव मन म सुलभ होइस सिंचाई के सुविधा
कबीरधाम, राज्य सरकार कोति ले चलाए जात रहे महत्वाकांक्षी ‘‘नरवा विकास’’ कार्यक्रम के तहत कवर्धा के दूरस्थ वनांचल स्थित भोथी गांव म अर्दन डेम (मिट्टी बांध) के निर्माण करे गए हे। एखर निर्माण ले 10 गांव भोथी, चिल्फी, साल्हेवारा, लूप, बोड़ला, बेन्दा, शीतलपानी, सिवनी, दुलदुला अऊ लोहारटोला के करीबन 120 परिवार ल अब कृषि जमीन म सिंचाई के बने सुविधा उपलब्ध हो गए हे। एखर पहिली वनांचल स्थित ए गांव मन ल सिंचाई संग निस्तारी आदि बर काफी दिक्कत के सामना करना परत रहिस।
वन अऊ जलवायु बदलाव मंत्री अऊ विधायक कवर्धा श्री मोहम्मद अकबर के पहल म एकर निर्माण कैम्पा मद अंतर्गत स्वीकृत राशि ले पानी के समस्या ले जूझत वनांचल स्थित भोथी गांव म करे गए हे। एखर निर्माण बर कैम्पा मद म भू-जल संरक्षण काम के तहत 39 लाख 89 हजार रूपिया के राशि स्वीकृत करे गए रहिस। भोथी गांव म ये माटी के बांध के निर्माण के समय आस-पास के गांव वाले मन संग बैगा परिवार के सदस्य मन ल करीबन 12 हजार 600 मानव दिवस के रोजगार घलोक मिले हे। ये संबंध म उहां के सरपंच श्री एकराम यादव अऊ गांव वाले मन ह खुशी-खुशी बताइन कि भोथी म अर्दन डैम के निर्माण ले क्षेत्र म खुशी के लहर दउड़ गए हे। एखर निर्माण ले भू-जल स्तर म वृद्धि होए हे अऊ आस-पास के गांव वाले मन अऊ किसान मन ल सिंचाई सुविधा संग निस्तारी आदि सुविधा के भरपूर लाभ मिले लगे हे।
