बेमेतरा, 19 दिसंबर 2020। मुख्यमंत्री श्री भूपेश बघेल ह आज इहां अपन निवास कार्यालय ले वीडियो कॉन्फ्रेंसिंग के जरिये बेमेतरा जिला के ग्राम सिलघट (भिंभौरी) म स्वतंत्रता संग्राम सेनानी स्वर्गीय श्री नाथूराम टिकरिहा, स्वर्गीय श्री सुकलाल टिकरिहा अऊ समाजसेवी स्वर्गीय श्री गोकुल प्रसाद टिकरिहा के प्रतिमा के अनावरण करिन। ग्राम सिलघट म उपस्थित राज्यसभा सांसद श्रीमती छाया वर्मा ह कार्यक्रम के अध्यक्षता करिन।
मुख्यमंत्री ह ये बेरा म कहिन के हमार सियान हमर धरोहर अऊ पथ प्रदर्शक हें। हमार समाज के संगें-संग देश के इतिहास म घलोक उंकर महत्वपूर्ण योगदान रहे हे। ग्राम सिलघट राजनीतिक, सामाजिक अऊ शैक्षणिक रूप ले प्रगति शील गांव रहे हे। जिहां बहुत अकन विभूति मन ह इहां जन्म लेहे हें। स्वतंत्रता संग्राम सेनानी स्वर्गीय श्री नाथूराम टिकरिहा अऊ स्वर्गीय श्री सुकलाल टिकरिहा ह देश के आजादी के लड़ई म बढ़-चढ़के हिस्सा लीन। ए दुनों महान विभूति मन ह आचार्य विनोवा भावे के संग भू-दान आंदोलन म घलोक महत्वपूर्ण योगदान देहे रहिन। समाजसेवी स्वर्गीय श्री गोकुल प्रसाद टिकरिहा 25 साल तक सरपंच रहिन। उमन घलोक भू-दान आंदोलन म महत्वपूर्ण योगदान देहे रहिन। ओ मन हमेशा किसान मन अऊ मजदूर मन के समस्या मन के समाधान बर प्रयासरत रहिन।
मुख्यमंत्री ह धान खरीदी व्यवस्था के संबंध म बताइन के धान खरीदी बर राज्य सरकार कोति ले बारदान के व्यवस्था के हर संभव प्रयास करे जात हे। राईस मिलर्स, पीडीएस अऊ किसान मन तीर उपलब्ध बारदाना मन के उपयोग धान खरीदी म करे के निर्णय लेहे गए हे। उमन ये बेरा म ग्राम सिलघट म मंगल भवन के स्वीकृति के घलोक घोषणा करिन।
ये बेरा म कलेक्टर बेमेतरा श्री शिव अनंत तायल, जिला पंचायत बेमेतरा के सदस्य श्री राहुल योगराज टिकरिहा, बेरला जनपद पंचायत के सदस्य कुमारी पूजा टिकरिहा, ग्राम पंचायत सिलघट के सरपंच श्रीमती संध्या टिकरिहा संग सर्वश्री योगानंद टिकरिहा, आदित्य टिकरिहा समेत टिकरिहा परिवार के सबो सदस्य अऊ ग्राम पंचायत सिलघट के ग्रामीण उपस्थित रहिन।
हमार सियान हमर धरोहर अऊ रस्ता देखईया, उंखर देश के इतिहास म घलोक महत्वपूर्ण योगदान: श्री भूपेश बघेल
