उद्यानिकी फसल मन ले बदलिस रूकमणी के किस्मत

राष्ट्रीय कृषि विकास योजना ह बनाइस सशक्त किसान
नारायणपुर, रूकमणी कहिथे- ‘हिम्मत अऊ सही जानकारी होही त किसान हर हालत म अपन हालत ल बदल सकत हे। पहिली मैं सिरिफ धान के खेती उपर निर्भर रहेंव, अब सब्जी के खेती ह हमर कमाई ल दुगुना कर देहे हे।‘ ग्राम एड़का के आन किसान घलोक अब रूकमणी ले प्रेरित होके उद्यानिकी फसल लेहे बर आगू बढ़त हें। एखर से न केवल किसान मन के आमदनी बाढ़त हे बल्कि स्थानीय स्तर म रोजगार के अवसर घलोक पैदा होवत हे।
मेहनत, सही दिशा अऊ सरकारी सहयोग ले किसान अपन आर्थिक हालत ल बदल सकत हे। नारायणपुर जिला के ग्राम एड़का के रूकमणी नाग के कहानी ए बात के जीता-जागता उदाहरण हे। कभू केवल धान के खेती ले गुजारा चलइया रूकमणी अब टमाटर, करेला अऊ मिर्च के उन्नत खेती करके सालाना हजारों रुपिया के अकतहा आमदनी पावत हे।
रूकमणी नाग पति दिनानाथ नाग पहिली पारंपरिक खेती ले परिवार के पालन-पोषण करत रहि। फेर उत्पादन घटे अऊ लागत बाढ़े ले आमदनी उपर असर परत रहिस। अइसन समय म ओ ल राष्ट्रीय कृषि विकास योजना अऊ उद्यानिकी विभाग के योजना मन के जानकारी मिलीस। रूकमणी ह न केवल जानकारी लीस, बल्कि ओला अमल म घलोक लाइस। विभागीय मार्गदर्शन अऊ अपन मेहनत ले वो ह अपन खेती ल नवा दिशा दीस।
अब रूकमणी नाग ह टमाटर, करेला अऊ मिर्च के उन्नत तकनीक ले खेती शुरू करे हे, जेखर से वोखर आय म पहिली ले कहूं जादा बढ़ोतरी होए हे। हाले म वो ह एके सीजन म 70 हजार रुपिया ले जादा के आमदनी कमाए हे, जेखर से वोखर परिवार के आर्थिक स्थिति म नवा अंजोर आए हे।
जिला प्रशासन अऊ उद्यानिकी विभाग के ये पहल ले सरकार के योजना मन के सही लाभ कहूं किसान मन तक पहुंचय त ग्रामीण अर्थव्यवस्था मजबूत हो सकत हे अऊ किसान मन के भविष्य सुरक्षित बन सकत हे।