कृषि मेला म सब्जी मन के ग्राफ्टेड पौधा मन बनहीं आकर्षण के केंद्र
रायपुर, 19 फरवरी 2020। राष्ट्रीय कृषि मेला के आयोजन 23 ले 25 फरवरी तक रायपुर के फल सब्जी मंडी प्रांगण तुलसी बाराडेरा म आयोजित करे जाही। कृषि मेला म सब्जी मन के ग्राफ्टेड पौधा जइसे पोमेटो (ग्राफ्टेड आलू अऊ टमाटर) विशेष आकर्षण के केंद्र रइही।
कृषि मेले म बैंगन, टमाटर अउर आन सब्जी मन के ग्राफ्टेड पौधा किसान मन के अवलोकन अऊ विक्रय बर बिहनिया 10 बजे ले संझा 6 बजे तक उपलब्ध रहिही। मेला स्थल म पौधा मन के ग्राफ्टिंग/ बडिंग के जीवंत प्रदर्शन करे जाही जऊन ल अवलोकन करके किसान ग्राफ्टेड पौधा के खेती अउर पौधा तियार करे के तकनीक घलोक सीख सकहीं।
उपरोपित (ग्राफ्टेड) पौधा मन ले उत्पादन म वृद्धि, पौधा मन के लउहे बढ़ोतरी, निमेटोड ले छुटकारा, निम्न अउर उच्च तापक्रम के प्रति सहनशीलता, पोषक तत्व मन ल लउहे अउर जादा मात्रा म लेहे के क्षमता म बढ़ोतरी, जलग्रहण क्षमता म बढ़ोतरी, जादा आर्द्रता के प्रति सहनशीलता अऊ गुणवत्ता म बढ़ोतरी जइसे बहुत अकन गुण मन ल देखते उपरोपित पौधा मन के उत्पादन ल बढ़ावा देहे जात हे।
छत्तीसगढ़ म सोलेनेसियस फसल जइसे टमाटर, बैंगन अउर मिर्च बहुतायत म लगाये जाथे जेकर से विल्ट जादा लगे ले किसान मन ल नुकसान होथे। कहूं इंकर ग्राफ्टेड पौधा लगाए जाय त नुकसान ले बचत होही। ग्राफ्टेड सब्जी मन के पौधा शासकीय उद्यानिकी विभाग के स्टाल ले घलोक प्राप्त करे जा सकथे।
