नेशनल सायकल पोलो चैम्पियनशिप 2023-2024 म विधानसभा अध्यक्ष डॉ. रमन सिंह ह बाटिन इनाम

दुर्ग, 05 जनवरी 2024/ दुर्ग जिला के भिलाई नगर म 3 ले 5 जनवरी 2024 तक 17वां पुरूष अउ 13वां महिला फेडरेंशन कप राष्ट्रीय सायकल पोलो चैम्पियनशिप संपन्न होइस। बीएसपी सायकल पोलो क्लब भिलाई अऊ छत्तीसगढ़ सायकल पोलो एसोसिएशन कोति ले आयोजित ये प्रतियोगिता म इंडियन आर्मी, टेरिटोरियल आर्मी, इंडियन एयरफोर्स संग छत्तीसगढ़, केरला, वेस्ट बंगाल, उत्तर प्रदेश अऊ महाराष्ट्र के 160 भाग लेवइया खिलाड़ी सम्मिलित होइन। प्रतियोगिता के समापन अवसर म पुरस्कार वितरण समारोह म प्रदेश के विधानसभा अध्यक्ष डॉ. रमन सिंह मुख्य अतिथि के रूप म सामिल होइन। उमन अपन हाथ ले विजेता खिलाड़ी मन ल पुरस्कार बाटिन। मुख्य अतिथि विधानसभ अध्यक्ष डॉ. रमन सिंह अपन संक्षिप्त उद्बोधन म प्रतियोगिता म सामिल सबो खिलाड़ी मनके स्वागत अउ अभिनंदन करत कहिन कि भाग लेवइया खिलाड़ी अपन प्रतिभा के जौहर देखात प्रदेश अउ देश के नाम रौशन करयं। उमन कहिन कि सायकल पोलो खेल म खिलाड़ी मन के भविष्य उज्जवल हे। बीएसपी अऊ सेल प्रतिभा मन ल उभारे बर हर संभव उदीम करथे। उमन खेल ल बढ़ावा देहे बर प्रतियोगिता आयोजन बर आयोजक मन ल साधुवाद ज्ञापित करिन। कार्यक्रम म नगर निगम भिलाई के महापौर श्री नीरज पाल, भिलाई इस्पात संयंत्र के डायरेक्टर श्री अनिर्बान दास गुप्ता, पूर्व विधायक श्री लाभचंद बाफना संग आन जनप्रतिनिधि, अधिकारीगण, भाग लेवइया खिलाड़ी अऊ बड़ संख्या म खेल प्रेमी उपस्थित रहिन।