मुफत उन्नत मक्का बीज बितरन ले किसान नेतराम के खेती होईस मजबूत, बढ़िया उपज अउ आय के बाढि़स भरोसा
सरगुजा, किसान मन के आय बढ़ाये, खेती के खरचा ला कम करे अउ मोटा अनाज के उपज ला बढ़ावा देहे के उद्देस ले कृषि विभाग कोती ले राष्ट्रीय खाद्य सुरक्षा अउ पोषण मिशन (मोटा अनाज) के अंतर्गत कइ योजना मन के सुघर संचालन करे जात हे। ए योजना मन के लाभ किसान मन तक पहुँचत हे अउ उमन आधुनिक अउ वैज्ञानिक खेती अपनाये बर प्रेरित होवत हें।
सरगुजा जिला के विकासखंड बतौली के गाँव गहिला के रहइया किसान नेतराम एकर एक प्रेरक उदाहरण हे। ओ ला राष्ट्रीय खाद्य सुरक्षा अउ पोषण मिशन (मोटा अनाज) के तहत मक्का प्रदर्शन कार्यक्रम मं मुफत उन्नत जात के मक्का बीज देहे गे हे। एकर ले ओकर खेती जादा मजबूत होए हे अउ बढ़िया उपज के संग आय बढ़े के आसा घलो जागे हे।
नेतराम करा लगभग 2.60 हेक्टेयर खेती भुइयाँ हे, जेन ओकर परिवार के आजीविका के मुख्य आधार हे। ओ ह बताइस के बछर 2026 मं कृषि विभाग, बतौली कोती ले आयोजित मक्का प्रदर्शन कार्यक्रम के तहत ओ ला तय मानक के मुताबिक 15 किलोग्राम उन्नत मक्का बीज मुफत मं देहे गीस।
ओ ह बताइस के बढ़िया किसम के बीज मिले ले सुघर फसल उपज के संभावना बाढ़े हे। संग मं बीज छिंचे मं होवइया उपराहा खरचा बाँचे ले खेती के खरचा मं घलो कमी आए हे। ओकर मानना हे के कहूं किसान मन ला सही समय मं उन्नत बीज, खातू अउ तकनीकी मारगदरसन मिलत रहय त कृषि उपज मं सुघर बढ़ोतरी के संग किसान मन के आर्थिक स्थिति घलो मजबूत होही।
नेतराम ह बताइस के कृषि विभाग के अधिकारी मन बीज वितरन के संगे-संग मक्का के वैज्ञानिक खेती, बोवाई के उन्नत तरीका, बीज उपचार, संतुलित खातू व्यवस्था अउ फसल सुरक्छा संबंधी उपयोगी जानकारी घलो दीन। एकर ले ओमन ला आधुनिक कृषि तकनीक मन ला अपनाये के भरोसा मिलिस अउ बढ़िया उपज के आसा बाढि़स। ओ ह कहिस के केंद्र अउ राज्य सरकार कोती ले किसान मन के हित मं चलाए जात योजना मन ग्रामीण क्षेत्र के किसान मन बर भारी फायदेमन्द साबित होवत हे। सही समे मं मिलइया सहायता अउ तकनीकी मारगदरसन ले किसान मन के आत्मबिस्वास बाढ़त हे अउ ओमन आधुनिक खेती कोती आगु बढ़त हे।
किसान नेतराम ह केंद्र सरकार, राज्य सरकार अउ कृषि विभाग के प्रति आभार जतावत कहिस के अइसन किसान हितैषी योजना मन खेती ला फायदेमन्द बनाये, किसान मन के आय मं बढ़ोतरी करे अउ मोटा अनाज मन के उपज ला बढ़ावा देहे मं सुग्घर भूमिका निभावत हे। ओ ह दुसर किसान मन ले घलो शासन के योजना मन के जादा ले जादा लाभ लेके वैज्ञानिक तरीका ले खेती करे के सलाह दीन।