मुख्यमंत्री ह वन शहीद मन के स्मृति म वन शहीद स्मारक के करिन अनावरण
रायपुर, 11 सितमबर 2024। मुख्यमंत्री श्री विष्णु देव साय ह आज राष्ट्रीय वन शहीद दिवस के अवसर म राजधानी रायपुर स्थित राजीव स्मृति वन पहुंचके वन शहीद मन ल श्रद्धांजलि दीन। उमन वन शहीद मन के सुरता म वन शहीद स्मारक के अनावरण करिन। मुख्यमंत्री श्री साय संग उपस्थित सबो मनखे मन ह दू मिनट मौन धारण करके वन शहीद मन के शहादत ल नमन करिन।
मुख्यमंत्री श्री साय ह ए बेरा म कहिन के आज भावना ले भरे दिन हे। हम उन वीर शहीद मन ल सुरता करत हन जे मन जंगल, प्राकृतिक संसाधन अऊ वन्य जीव मन के रक्षा करत अपन प्राण के आहुति दे दीन। उमन कहिन कि वन शहीद मन के शहादत हमला पर्यावरण संरक्षण के महत्ता अऊ एला संरक्षित करे खातिर हमर जिम्मेदारी के सुरता देवाथे।
ए विशेष अवसर म मुख्यमंत्री, वन मंत्री अऊ राजस्व मंत्री ह अपन पिता के स्मृति म पौधा रोपिन। जानबा हे कि वन शहीद मन के सुरता म आज राजधानी रायपुर के राजीव स्मृति वन म 20वां राष्ट्रीय वन शहीद दिवस के आयोजन करे गीस।
कार्यक्रम म वन मंत्री श्री केदार कश्यप, राजस्व मंत्री श्री टंकराम वर्मा, विधायक श्री पुरंदर मिश्रा, वन बल प्रमुख श्री व्ही श्रीनिवास राव, अखिल भारतीय वन अधिकारी महासंघ के अध्यक्ष श्री सतीश मिश्रा, चेयरमैन श्री दिग्विजय सिंह संग कई ठन राज्य मन ले आए पदाधिकारी अऊ बड़ संख्या म वनकर्मी मौजूद रहिन।