राष्ट्रीय बालिका दिवस : प्रदेश म जन-जागरूकता बर होइस कई कार्यक्रम

रायपुर, राष्ट्रीय बालिका दिवस प्रदेश म बालिका मन के सुरक्षा, अधिकार, सुविधा, सम्मान अऊ आजादी के प्रति मनखे मन ल जागरूक करे बर कई ठन आयोजन करे गीस। ये दौरान मनखे मन ल बालिका मन के प्रति भेदभाव न करके ओ मन ल लड़का मन जइसे आगू बढ़े के अवसर प्रदान करे बर प्रेरित करे गीस।
प्रदेश के सबो जिला मन म जन-जागरूकता बर स्कूल, कालेज, आंगनबाड़ी अऊ पंचायत मन म कई ठन आयोजन होइस। ये मां रंगोली, निबंध, वाद-विवाद प्रतियोगिता के माध्यम ले बेटी बचाव बेटी पढ़ाओं के संदेश देहे के संग बालिका अधिकार मन के बारे म बताए गीस। ये बेरा म बालिका अऊ किशोरी मन के स्वास्थ जांच घलोक करे गीस। बालिका मन ल ऊंखर अधिकार, शिक्षा, स्वास्थ अऊ पोषण के संबंध म जानकारी देहे गीस अऊ आगू बढ़े बर प्रेरित करे गीस। रैली के माध्यम ले घलोक मनखे मन म बालिका मन के प्रति सकारात्मक वातावरण बनाए के प्रयास करे गीस।