रायपुर 03 मार्च 2024। मुख्यमंत्री श्री विष्णु देव साय ह आज अपन गृह ग्राम बगिया म नन्हे लइका मन ल पोलियो दवई के दू बूंंद पिया के ए राष्ट्रीय अभियान के शुरुआत करिन। मुख्यमंत्री श्री साय ह ए बेरा म अपन घर म लइका दिव्यांश यादव,डेविड साय अउ शीतल पैकरा ल गोदी म लेके ड्रॉप पियाइन। मुख्यमंत्री श्री साय ह अभिभावक मन ले आव्हान करत कहिन कि ओ मन अपन लइका मन ल दू बूंद जिंदगी के खुराक खच्चित नियावयं ताकि कोनो घलोक लइका छूटे झन जाए।
जानबा हे कि आज राष्ट्रीय सघन पल्स पोलियो अभियान 3 मार्च 2024 के आयोजित करे जात हे। पल्स पोलियो अभियान तीन दिन तक चलाए जाही। पहिली दिन 3 मार्च के पोलियो बूथ म 0 ले 5 साल के लइका मन ल पोलियो के खुराक पियाए जाही। 04 अउ 05 मार्च के टीम सदस्य मन घर-घर जाके छूटे लइका मन ल पोलियो ड्राप पियाहीं। स्वास्थ्य केन्द्र अउ आगनबाड़ी केन्द्र मन ल पोलियो बूथ बनाए जाही अउ स्वास्थ्य कार्यकर्ता, आगनबाड़ी कार्यकर्ता, मितानीन के माध्यम ले टीम के गठन करे गए हे।
