युवा मन म नेतृत्व अउ सेवा भाव के ससक्त मंच बनही राष्ट्रीय जंबूरी: मुख्यमंत्री श्री विष्णु देव साय

मुख्यमंत्री श्री विष्णुदेव साय ले भारत स्काउट एवं गाइड्स के राष्ट्रीय अध्यक्ष डॉ. अनिल जैन ह करिन सौजन्य मुलाकात
रायपुर / मुख्यमंत्री श्री विष्णु देव साय ले आज मुख्यमंत्री निवास म पूर्व राज्यसभा सांसद अउ भारत स्काउट्स एवं गाइड्स के राष्ट्रीय अध्यक्ष डॉ. अनिल जैन ह सौजन्य भेंट करिन। मुख्यमंत्री श्री साय ह छत्तीसगढ़ प्रवास म आए श्री जैन के स्वागत करत उनला बस्तर आर्ट के प्रतीक चिन्ह भेंट करिन।
मुख्यमंत्री श्री विष्णुदेव साय ह छत्तीसगढ़ के बालोद जिला म पहिली पइत आयोजित होवत पांच दिवसीय राष्ट्रीय रोवर–रेंजर जंबूरी आयोजन बर डॉ. अनिल जैन ल हार्दिक सुभकामना दीहिन अउ एला छत्तीसगढ़ के युवा मन बर गौरव के विसय बताइन।
मुख्यमंत्री श्री साय ह कहिन के डॉ. अनिल जैन के सक्षम नेतृत्व म भारत स्काउट्स एवं गाइड्स के राष्ट्रीय स्तर के आयोजन छत्तीसगढ़ म आयोजित होना राज्य बर एक ठन महत्वपूर्ण उपलब्धि हरे। उमन कहिन के ए जंबूरी युवा मन म अनुसासन, नेतृत्व क्षमता, सामाजिक उत्तरदायित्व अउ सेवा भाव ल मजबूत करे के एक ठन प्रभावी मंच बनही। देस के अलग-अलग राज्य ले आए रोवर-रेंजर मन के माध्यम ले छत्तीसगढ़ के सांस्कृतिक, सामाजिक अउ युवा सक्ति के राष्ट्रीय स्तर म ससक्त प्रदर्सन होही।
मुख्यमंत्री श्री साय ह विस्वास जताइन के ए जंबूरी न केवल युवा मन ल रास्ट्र निर्माण के दिसा म प्रेरित करही, भलुक “एक भारत-स्रेष्ठ भारत” के भावना ल घलो मजबूत करही। उमन कहिन के छत्तीसगढ़ सरकार युवा मन के सर्वांगीण विकास बर अइसन आयोजन मन ल लगातार प्रोत्साहित करत रइही।
ए मौका म मुख्यमंत्री के प्रमुख सचिव श्री सुबोध कुमार सिंह, मुख्यमंत्री के सचिव श्री राहुल भगत सहित आन गणमान्यजन उपस्थित रिहिन।