रायपुर, 06 जून 2024। राष्ट्रीय म्यू थाई चैम्पियनशिप (National Muay Thai Championship) म छत्तीसगढ़ के खिलाड़ी मन के शानदार प्रदर्शन म खेल मंत्री श्री टंकराम वर्मा ह बधाई अउ शुभकामना देहे हे। ए चैम्पियनशिम म पदक पवइया खिलाड़ी मन ह आज राजधानी रायपुर पहुंचके खेल मंत्री श्री वर्मा ले ऊंखर निवास कार्यालय म सौजन्य मुलाकात करिन खेल मंत्री श्री वर्मा ह खिलाड़ी मन के उछाह ल बढ़ावत सबो पदक पवइया खिलाड़ी मन ल बधाई अउ शुभकामना दीन। उमन प्रतियोगिता म उल्लेखनीय प्रदर्शन करइया खिलाड़ी मन के उछाह ल बढ़ा के उंखर हौसला बढ़ाइन।
जानबा हे कि असम के लक्ष्मीबाई नेशनल इंस्टीट्यूट ऑफ फिजिकल एजुकेशन (Lakshmibai National Institute of Physical Education) के स्टेडियम तेपेसिया, गुवाहाटी म 25 ले 30 मई 2024 तक म्यू थाई चैम्पियनशिप के आयोजन करे गए रहिस। ए प्रतियोगिता म छत्तीसगढ़ के 04 खिलाड़ी मन ह स्वर्ण पदक अउ 03 खिलाड़ी मन ह कांस्य पदक जीते हें। म्यूथाई खेल ल अंतर्राष्ट्रीय ओलंपिक ले मान्यता प्राप्त हे अउ पेरिस ओलंपिक-2024 (Paris olympics-2024) म डेमोंसट्रेशन के रुप म सामिल करे गए हे। ए राष्ट्रीय चैपियनशिप म 29 राज्य मन के लगभग 850 खिलाड़ी अऊ अधिकारी मन ह भाग लेहे हें।
राष्ट्रीय म्यू थाई चैम्पियनशिप म स्वर्ण पदक विजेता खिलाड़ी मन म श्री राजकुमार, दिव्या अग्रवाल, तोषी पांडे अऊ समिधा अग्रवाल के नाम सामिल हे। इही प्रकार ले कांस्य पदक विजेता खिलाड़ी मन म श्री शुभांश मानिकपुरी, श्री प्रवीण जायसवाल अऊ अर्चित केशवानी सामिल हे। एखरे संग जय कुमार, आर्यन पटेल, भावजोत सिंग ह बेहतरीन प्रदर्शन करत क्वार्टर फाइनल तक पहुंचे रहिन। ए प्रतियोगिता म छत्तीसगढ़ के रायपुर स्थित विवेकानंद मार्शल आर्ट्स फिटनेस क्लब, देवेंद्र नगर के 10 खिलाड़ी मन ह कोच श्री अमन यादव के नेतृत्व म बेहतरीन प्रदर्शन करत 4 स्वर्ण पदक अऊ 3 कांस्य पदक जीतके छत्तीसगढ़ राज्य के नाम रोशन करे हें।
