पोषण बनत हे गर्भवती माता मन खातिर वरदान श्रीमती पुष्पा ह दीस स्वस्थ बेटी ल जनम

दुर्ग, राष्ट्रीय पोषण महिना 2025 के समय छत्तीसगढ़ म महिला अऊ बाल विकास विभाग कोति ले करे जात उदीम मन ले माता अऊ लइका मन के स्वास्थ्य म बनेच परिणाम मिलत हे। दुर्ग जिला के ग्राम भानपुरी के श्रीमती पुष्पा ठाकुर के कहानी एकर सुंदर उदाहरण हे।
पुष्पा के ये पहली गर्भावस्था रहिस। शुरुआत म ओ ल उल्टी, कमजोरी अऊ भूख नइ लगे जइसे समस्या रहिस। जानकारी के कमी के सेती वो सही खानपान नइ ले पात रहिस। ए बेरा म महिला अऊ बाल विकास विभाग के पर्यवेक्षक श्रीमती सोनल सोनी अऊ आंगनबाड़ी कार्यकर्ता श्रीमती शशि देवांगन ह वोखर घर जाके सरलग सलाह देत रहस अऊ परिवार ल घलोक गर्भवती महिला के देखभाल के बारे म समझावत रहिस।
‘पोषण खजाना’ के तहत मिलइया पौष्टिक आहार, रेडी-टू-ईट फूड, हरियर साग-भाजी, दाल, दूध अऊ फल के संग आयरन अउ कैल्शियम के गोली मन के नियमित सेवन ले पुष्पा के स्वास्थ्य धीरे-धीरे सुधर गे। पहिली ओखर वजन 40 किलोग्राम अऊ हीमोग्लोबिन 9 ग्राम रहिस, जेन गर्भावस्था के आखरी तक बढ़के वनज 52 किलोग्राम अऊ हीमोग्लोबिन 10.9 ग्राम तक पहुंच गे। नियमित जांच अऊ आंगनबाड़ी दीदी के देखभाल ले पुष्पा ल गर्भावस्था म कोनो परेशानी नइ होइस। 27 सितंबर 2025 के राष्ट्रीय पोषण महिना के समय ही वो ह शासकीय अस्पताल दुर्ग म 2.700 किलोग्राम वजनी स्वस्थ बेटी ल जन्म दीस।
मुख्यमंत्री श्री विष्णु देव साय ह कहिस के मां अऊ शिशु के स्वास्थ्य हमर सबले पहिली प्राथमिकता हे। पोषण के क्षेत्र म छत्तीसगढ़ सरलग प्रगति करत हे। महिला अऊ बाल विकास मंत्री श्रीमती लक्ष्मी राजवाड़े ह कहिस के पोषण खजाना जइसे योजना मन ग्रामीण माता मन के जीवन म सकारात्मक बदलाव लावत हे। हमर लक्ष्य हे के हर गर्भवती अऊ धात्री महिला ल भरपूर पोषण मिलय।