- मरीज मन के बढियां इलाज अउ देखरेख खातिर मिलिस इनाम
- 91.8 प्रतिशत अंक के संग सामुदायिक स्वास्थ्य केंद्र लोरमी ल मिलिस सबले पहली स्थान
मुंगेली 15 अप्रैल 2020। कोरोना संकट के बीच मुंगेली जिला के सामुदायिक स्वास्थ्य केंद्र लोरमी बर बड़े जबर खबर आय हे। सामुदायिक स्वास्थ्य केंद्र ल मरीज मनके सुघ्घर इलाज अउ देख-रेख बर राष्ट्रीय स्तर के क्वालिटी एसयुरेन्स अवार्ड ले सम्मानित करे गे हे। भारत सरकार स्वास्थ्य मंत्रालय नई दिल्ली के संयुक्त सचिव श्री विकास शील जी ह राज्य शासन के स्वास्थ्य सचिव श्रीमती निहारिका बारीक ल लिखे चिट्ठी म ये बात के खबर दे हावंय। कलेक्टर डॉ. सर्वेश्वर नरेंद्र भुरे ह ये गौरवपूर्ण उपलब्धि बर विकास खण्ड चिकित्सा अधिकारी डॉ. जी. एस दाऊ सहित स्वास्थ्य विभाग के डॉक्टर, चिकित्सा कर्मी अउ प्रबन्धन ल बधाई, शुभकामनाएं दे हावंय । जाँच म सामुदायिक स्वास्थ्य केंद्र ल सबले जादा 91.8 प्रतिशत नम्बर मिले हे । मुंगेली जिला के सामुदायिक स्वास्थ्य केंद्र लोरमी जम्मो छत्तीसगढ़ म पहला सामुदायिक स्वास्थ्य केंद्र हावय, जेला अतका जादा नम्बर के संग राष्ट्रीय स्तर के क्वालिटी एसयुरेन्स अवार्ड हासिल होय हे।
मुख्य चिकित्सा अउ स्वास्थ्य अधिकारी डॉ. कमलेश खैरवार ह बताइन के भारत सरकार के स्वास्थ्य मंत्रालय के टीम मन पिछला 6 – 7 फरवरी 2020 के सामुदायिक स्वास्थ्य केंद्र लोरमी म काम-काज, सेवा अउ सुविधा के बारे म गहराई से निरीक्षण, परीक्षण अउ अवलोकन करिन, टीम के अधिकारी मन गुणवत्ता मापदण्ड ल परखिन। खास करके प्रसूति, आपरेशन कक्ष ओपीडी, रेडियोलॉजी, पीपी यूनिट, पैथोलॉजी, ब्लड बैंक ल स्वयं अपन आँखी म देखिन अउ मरीज मनखे मन से बातचीत करके अस्पताल के प्रति ओमन के धारणा ल घलो नोट करिन। एखर बाद भारत सरकार के स्वास्थ्य मंत्रालय के टीम ह क्वालिटी एसयुरेन्स अवार्ड अउ प्रमाणपत्र दे गिस। प्रतिष्ठित पुरस्कार पाय बर जिला कलेक्टर डॉ. भुरे के सहयोग अउ मार्गदर्शन महत्वपूर्ण रहिस हावय। ओमन स्वयं रुचि लेके सामुदायिक स्वास्थ्य केंद्र लोरमी के जरूरत अउ सुविधा ल देख के तत्काल व्यवस्था कराइन। सामुदायिक स्वास्थ्य केंद्र ल अवार्ड स्तर तक पहुँचाय म सामुदायिक स्वास्थ्य केंद्र के डॉक्टर, नर्स अउ स्वास्थ्य कर्मी मन के समर्पण के संग काम करे ल योगदान रहिस। राष्ट्रीय स्तर के गौरवपूर्ण अवार्ड मिले ल सामुदायिक स्वास्थ्य केंद्र के डॉक्टर अउ कर्मचारी म अति आनंद देखे जात हे।
