छत्तीसगढ़ म पहिली पईत ‘राष्ट्रीय रामायण महोत्सव’ के आयोजन

1 ले 3 जून तक रायगढ़ के राम-लीला मैदान म आयोजित होही रामायण प्रतियोगिता
देश के विभिन्न राज्य अउ विदेशी कलाकार तको होही सम्मेलित
अरण्यकांड म केंद्रित प्रसंग के होही बिसेस प्रस्तुति
केलो आरती अउ सामूहिक हनुमान चालीसा के होही पाठ
रायपुर, मुख्यमंत्री श्री भूपेश बघेल के बिसेस पहल म राष्ट्रीय आदिवासी नृत्य महोत्सव के तर्ज म रायगढ़ म अवईया महिना के 1 जून ले 3 जून तक तीन दिन के भव्य राष्ट्रीय रामायण महोत्सव के आयोजन होवईया हे। संस्कृति विभाग कती ले ए आयोजन के जोर-शोर ले तियारि करे जाथ हे। आदिवासी नृत्य महोत्सव के जईसे ही देश के आन राज्य संग विदेशी कलाकार मन ल घलोक नेवते जात हे। अबड़ जलदी छत्तीसगढ़ के धरती म देश-विदेश के कलाकार मन के रामायण के सुग्‍घर प्रस्तुति देखे ह मिलही।
संस्कृति विभाग के अधिकारि ह बताइस कि रामायण महोत्सव म देश के कई राज्य ले आए मानस मंडली के कलाकार मन मझनिया 2 बजे ले संझा 6 बजे तक अउ विदेश ले आए मानस मंडली ह रतिहा 8 बजे ले 10 बजे तक प्रस्तुति दीही। ए भव्य आयोजन म अरण्यकांड उपर केंद्रित प्रसंग उपर राज्य मन ले आए मानस दल के संग विदेशी दल कती ले रामायण के प्रस्तुति होही। राष्ट्रीय रामायण महोत्सव म सामूहिक हनुमान चालीसा अउ भव्य केलो आरती के आयोजन तको करे जाही, जेमा हजारों के संख्या म दीपदान करे जाही।
संस्कृति विभाग के अधिकारि ह बताइस कि प्रदेश म पहिली पईत संस्कृति विभाग कती ले राष्ट्रीय रामायण महोत्सव के भव्य आयोजन रायगढ़ के राम लीला मैदान म करे जाही। ए महोत्सव म शामिल होवइया मानस मंडलि ल पुरस्कृत करे जाही। जेमा प्रथम पुरस्कार 5 लाख रूपिया, द्वितीय पुरस्कार 3 लाख रूपिया अउ तृतीय पुरस्कार के राशि 2 लाख रूपिया तय करे गए हे। राज्य सरकार कती ले राष्ट्रीय स्तर के ए आयोजन ले प्रदेश के संस्कृति ल संजोए के दिशा म एक अनोखा पहल होही।