छोट-छोट लापरवाही ले बचे जाय त, बच जाही अनमोल जीवन: मुख्यमंत्री श्री विष्णु देव साय

रायपुर, 24 जनवरी 2024। मुख्यमंत्री श्री विष्णु देव साय आज राजधानी रायपुर म आयोजित राष्ट्रीय सड़क सुरक्षा लघु फिल्म महोत्सव म सामिल होइन। दू दिन के राष्ट्रीय लघु फिल्म महोत्सव के आयोजन रायपुर के मेडिकल कॉलेज स्थित अटल बिहारी वाजपेयी ऑडिटोरियम म करे गए हे। मुख्यमंत्री ह दीप प्रज्ज्वलित करके कार्यक्रम के शुभारंभ करिन। मुख्यमंत्री ह ए मौका म सड़क सुरक्षा म बने लघु फिल्म ’फाइनल्स’ अउ ’गलती मोर सजा तोर’ घलोक देखिन।
मुख्यमंत्री श्री विष्णु देव साय ह कार्यक्रम ल संबोधित करत कहिन कि आज राष्ट्रीय सड़क सुरक्षा लघु फिल्म महोत्सव म लघु फिल्म मन के माध्यम ले बताए गीस कि छोटे-छोटे लापरवाही ले एक अनमोल जीवन चले जाथे। एला बचाए जा सकत हे, कहूं ट्रैफिक के नियम के पूरा पालन करे जाए। मैं ह ये फिल्म देखेंव अऊ यातायात विभाग ह क्रिएटिव माध्यम ले ए लापरवाही मन ल बताए हे, जेखर बहुत अच्छा असर दर्शक मन उपर परही अऊ ओ मन ट्रैफिक ले संबंधित सावधानी बरतहीं। यातायात के नियम मन के पालन नइ करे के सेती मनखे असमय ही काल के ग्रास म चले जाथे। यातायात विभाग अऊ पुलिस विभाग यातायात नियम मन के पालन सड़क सुरक्षा के उपाय मन के प्रति मनखे मन ल जागरूक करे के काम तो सरलग करतेच हे, अभियान घलोक चलाथे। फेर हमला खुदे सड़क सुरक्षा के उपाय के कड़ाई के संग पालन करना चाही। सबो के जीवन बहुत कीमती हे, छोटे-छोटे लापरवाही ले सड़क दुर्घटना होथे अऊ ये मां कई मनखे मन के मृत्यु हो जाथे। कई परिवार उजड़ जाथे।
ए बेरा म उप मुख्यमंत्री श्री अरूण साव, सांसद श्री सुनील सोनी, विधायक श्री पुरंदर मिश्रा, श्री अनुज शर्मा अऊ विधायक श्री मोतीलाल साहू, परिवहन विभाग के सचिव श्री एस. प्रकाश, अकतहा पुलिस महानिदेशक द्वय श्री प्रदीप गुप्ता अऊ श्री दीपांशु काबरा, जनसंपर्क आयुक्त श्री मयंक श्रीवास्तव घलोक उपस्थित रहिन।