मनरेगा ले बने तालाब ह पानी के समस्या के समाधान करके खोलिस आजीविका के रद्दा
बैगा बाहुल्य वनांचल ग्राम दुर्जनपुर म गांव वाले मन ल मिलीस रोजगार अऊ मछलीपालन के साधन
कबीरधाम, ग्रामीण क्षेत्र मन म वर्षा जल ल संजोय रखे खातिर डबरी, कूप, तालाब मन के निर्माण बड़का पैमाना म करे जात हे। महात्मा गांधी राष्ट्रीय ग्रामीण रोजगार गारंटी योजना ले तालाब गहरीकरण करके जल समस्या के स्थायी समाधान करे जात हे। विकासखण्ड बोड़ला के बैगा बाहूल्य ग्राम पंचायत दुर्जनपुर के आश्रित मोहल्ला इन्द्रिपानी विशेष पिछड़ी जनजाति बैगा बाहुल्य बस्ती हे, जेन पंचायत मुख्यालय ले करीब 3 किमी दूर स्थित हे। इहां 65 परिवार रहिथे जिंकर कुल जनसंख्या 257 हे। पानी के गंभीर समस्या के सेती गांव वाले मन ल निस्तारी खातिर काफी कठिनाई होत रहिस। जेखर बर जल संरक्षण के जरूरत ल देखत तालाब गहरीकरण के काम कराए गीस।
ग्रामीण मन ह जल समस्या ले निजात पाय खातिर ग्राम सभा म तालाब गहरीकरण करे के प्रस्ताव प्रस्तुत करिन। जेखर बाद काम के स्वीकृति महात्मा गांधी राष्ट्रीय ग्रामीण रोजगार गारंटी योजना ले करे गीस। काम स्वीकृति के बाद गांव वाले मन ह मिलके तालाब गहरीकरण के काम समय-सीमा म पूरा करिन। निर्माण काम म लगे गांव वाले मन ल मजदूरी के राशि ऊंखर बैंक खाता म प्राप्त हो गे। महिला स्व सहायता समूह खातिर ओ मन ल मत्स्य पालन विभाग ले मछली बीज उपलब्ध कराये गीस। जानबा हे कि वनांचल ग्राम पंचायत दुर्जनपुर विशेष पिछड़ी जनजाति बैगा बाहूल्य अऊ दूर्गम पहाड़ी क्षेत्र म बसे हे जिहां वर्षा जल के संरक्षण म समस्या होथे। तालाब बर जगा के चिन्हांरी बड़ समस्या रहिस। जेन ल सबो गांव वाले मन के प्रयास ले हल करे गीस अऊ महात्मा गांधी नेरगा के मैदानी अमला के सहयोग के काम के संपादन करे गीस। वर्षा जल के बोहा जाना गांव वाले मन खातिर बहुत बड़ समस्या रहिस काबर के गांव वाले मन कृषि खातिर वर्षा जल उपर ही निर्भर रहिन। वर्षा जल उपर निर्भरता के सेती बारहमासी फसल लेहे म ग्रामीण असमर्थ रहिन।
काम के परिणाम
दुर्जनपुर म वर्षा जल संरक्षण खातिर ये तालाब गहरीकरण काम वरदान के रूप म आगू आइस। जिहां पहिली वर्षा जल के बेवजह बह जाना गांव वाले मन खातिर बहुत बड़ समस्या रहीस उंहें अब तालाब के बने ले समस्या खतम हो गे हे अऊ पानी रुके लगे हे। 9 लाख 80 हजार रुपिया के लागत ले होए काम म 5084 मानव दिवस के रोजगार गांव वाले मन ल मिलीस जेखर बर गांव वाले मन ल 9 लाख 65 हजार 960 रुपिया के मजदूरी के तको भुगतान प्राप्त होइस। जल संचय के समस्या ले निजात पाय के बाद ग्रामीण अब तालाब ले व्यवसाय घलोक करे लगे हें। ग्रामीण महिला मन कोति ले संचालित बूढ़ी माई महिला स्व सहायता समूह ह मछली पालन के काम करत हे। मछली पालन ले समूह के महिला मन ल आर्थिक लाभ होवत हे। समूह ल मत्स्य विभाग ले समन्वय करके 28 किलो मछली बीज उपलब्ध कराए गए हे। मत्स्य पालन शुरू करे ले अभी तक 23,000 के आय अर्जित होय हे अऊ ये सरलग जारी हे। जेखर बाद समूह सरलग मछली पालन के काम करत हे। तालाब ले मछलीपालन अउ सिंचाई के काम सुगम हो गए हे। ग्राम पंचायत दुर्जनपुर के इन्द्रिपानी मोहल्ला म तालाब गहरीकरण अऊ मत्स्य पालन ह गांव के तस्वीर बदल देहे हे। अब इहां पानी के समस्या दूर हो गए हे, परिवार मन ल स्थायी आजीविका के साधन मिले हे अऊ सामूहिक संगठन के शक्ति बाढ़े हे।