राष्ट्रीय ग्रामीण आजीविका मिशन बिहान ले जुड़के महिला मन ह स्वरोजगार के रद्दा अपनाइन

जशपुर, मुख्यमंत्री श्री विष्णु देव साय के अगुवई म राष्ट्रीय ग्रामीण आजीविका मिशन बिहान योजना के फायदा उठाके महिला मन अपन जीवन म सकारात्मक बदलाव लावत हें। ए कड़ी म जशपुर जिला के ग्रामीण महिला मन आत्मनिर्भरता के मिसाल गढ़त हें। कांसाबेल विकासखंड के ग्राम सेम्हर कछार के हरियाली स्वसहायता समूह के 11 महिला मन ह छिंद कासा ले आकर्षक टोकरी अऊ आन पारंपरिक हस्तशिल्प उत्पाद तैयार करके अपन आजीविका ल मजबूत करत हें।
समूह के सदस्य श्रीमती बालमुनि भगत ह बताइस के बिहान योजना ले जुड़े के बाद ओ ल स्वरोजगार के अवसर मिलीस। पहिली महिला मन केवल घरेलू कामकाज तक सीमित रहिन, फेर अब ओ मन सालाना अंदाजन 60 ले 70 हजार रूपिया तक के कमाई करत हें। ये काम महिला मन ल आर्थिक रूप ले सशक्त बनाए के संगे-संग आत्मविश्वास घलोक देवत हे।
महिला मन ह बताइन के बिहान योजना ह ऊंखर जीवन म सकारात्मक बदलाव लाए हे। समूह के माध्यम ले प्रशिक्षण, सहयोग अऊ विपणन सुविधा मिले ले उंखर उत्पाद अब स्थानीय हाट-बाजार अऊ मेला मन म लोकप्रिय हो चुके हे। महिला मन कहत हें के अब ओ मन सिरिफ घर तक सीमित नइ रहिन, भलुक अपन पहिचान खुद बनावत हें। समूह के दीदी मन ह मुख्यमंत्री श्री विष्णुदेव साय अऊ जिला प्रशासन के आभार व्यक्त करत कहिन के शासन के योजना मन ले हम सशक्त अऊ आत्मनिर्भर होवत हन।