धमतरी: डेली नीड्स के दुकान ले सुनीता ल रोजेच 500 ले 700 रूपिया के होवत हे आमदनी

धमतरी, 13 जनवरी 2024। राष्ट्रीय ग्रामीण आजीविका मिशन ’बिहान’ ले महिला मन खुदे आत्मनिर्भर होवत हें। संगेच आन महिला मन ल घलोक आत्मनिर्भर बने के प्रेरणा देवत हें। अइसनहे महिला सेहराडबरी के श्रीमती सुनीता साहू हे। विकसित भारत संकल्प यात्रा के तहत ग्राम सेहराडबरी म लगे संकल्प शिविर म पहुंचे सुनीता ह अपन कहानी अपन जुबानी बतात कहिस कि ओ ह राष्ट्रीय ग्रामीण आजीविका मिशन के तहत स्व सहायता समूह म जुड़े के पहिली घर के काम करत रहिस अऊ छोटे-मोटे जरूरत मन बर पति अऊ परिवार उपर निर्भर रहत रहिस। एखर बाद ओ मन ल योजना ले जुड़े गांव के ही कुछ महिला मन ह स्व सहायता समूह ले होवइया फायदा के बारे म बारिकी ले जानकारी दीन।
सुनीता ह एखर से प्रभावित होके लउहे स्व सहायता समूह ले जुड़े बर अपन हामी भर दीस। वैष्णवी स्व सहायता समूह ले जुड़े के बाद सुनीता सक्रिय महिला के रूप म चुने गीस। समूह के बचत, ग्राम संगठन अउ बैंक लिंकेज ले कम ब्याज दर म मिलइया करजा के जानकारी लीस अऊ दू लाख रूपिया के करजा लेके आजीविका बर डेलीनीड्स के दुकान संचालित करे लगिस। एखर से सुनीता ल रोजेच 500 ले 700 रूपिया के आमदनी होए लगीस।
सुनीता के बताती अभी हाले म डेली नीड्स के दुकान चलाय के संग सक्रिय महिला के रूप म काम करके अपन दायित्व के निर्वहन करत हे। सुनीता ह बिहान ले जुड़े के बाद कई प्रशिक्षण घलोक प्राप्त करिस। एमां 5 दिवसीय पुस्तक संचालन प्रशिक्षण, 7 दिवसीय सक्रिय महिला प्रशिक्षण, 6 दिवसीय सामाजिक सर्वेक्षण के प्रशिक्षण अऊ 3 दिवसीय टीएमआईएस के प्रशिक्षण सामिल हे। एखर संगेच ओ मन गांव के आन महिला मन ल आत्मनिर्भर बने बर प्रोत्साहित घलोक करत हे। उमन प्रधानमंत्री श्री नरेन्द्र मोदी के आभार व्यक्त करिन कि राष्ट्रीय ग्रामीण आजीविका मिशन ले ओ मन ल अपन छोटे-मोटे जरूरत मन ल पूरा करे बर कोनो के आगू हाथ फैलाय के जरूरत नइ हे। ओ मन खुद अपन अऊ परिवार ल आजीविका बर आर्थिक मदद करत हे।