राष्ट्रीय सुपरक्रॉस चैंपियनशिप म दउंडि़स जोश अऊ जिम्मेदारी – मुख्यमंत्री साय बोलिन, जीवन अनमोल हे, हेलमेट जरूर पहिरव

रायपुर, सहर के बूढ़ापारा आउटडोर स्टेडियम म रोमांच अऊ ऊर्जा ले भरपूर राष्ट्रीय सुपरक्रॉस बाइक रेसिंग चैंपियनशिप-2025 के आयोजन होइस। ये कार्यक्रम छत्तीसगढ़ राज्य स्थापना के रजत जयंती समारोह के श्रृंखला के हिस्सा रहिस। देशभर ले आए 100 ले जादा प्रोफेशनल राइडर मन ह अपन कौशल के प्रदर्शन करिन, जेन ल देखे हजारों दर्शक सकलाइन।
मुख्यमंत्री श्री विष्णु देव साय ह आयोजन के शुभारंभ करिन अऊ युवा मन के उत्साहवर्धन करत कहिन के ये सिरिफ एक रेस भर नो हे, बल्कि अनुशासन, साहस अऊ जिम्मेदारी के उत्सव हे। उमन युवा मन ल संदेश दीन – “जीवन अनमोल हे, हेलमेट पहिरव अऊ जिम्मेदार नागरिक बनव।”
मुख्यमंत्री ह कहिन के जइसे रजत जयंती महोत्सव के समय एयर शो ह देशभक्ति के जोश जगाइस, वइसनहे ये सुपरक्रॉस चैंपियनशिप युवा मन के ऊर्जा ल नवा दिशा देवत हे। उमन बताइन के राज्य सरकार खेल अधोसंरचना, स्पोर्ट्स टूरिज़्म अऊ मोटर स्पोर्ट्स ल प्रोत्साहित करे खातिर ठोस उदीम करत हे।
ए बेरा म विधानसभा अध्यक्ष डॉ. रमन सिंह, मंत्री गुरू खुशवंत साहेब, सांसद श्री बृजमोहन अग्रवाल, विधायक श्री अनुज शर्मा अऊ बड़ संख्या म दर्शक उपस्थित रहिन। मुख्यमंत्री ह सबो प्रतिभागी मन ल सुरक्षित रेसिंग के शुभकामना दीन।