दंतेवाड़ा के बेटी मन ह बढ़ाइन प्रदेश के मान

राष्ट्रीय थाई बॉक्सिंग चौंपियनशिप म स्वर्ण पदक जितईया नूपुर, छाया अऊ नेहल ह रचिस इतिहास
दंतेवाड़ा, मुख्यमंत्री श्री विष्णु देव साय के सरकार  ग्रामीण अऊ नक्सल प्रभावित क्षेत्र मन के युवा मन ल खेल, शिक्षा अउ रोजगार के अवसर प्रदान करके उंखर प्रतिभा ल नवा ऊंचाइ तक पहुंचावत हे। दंतेवाड़ा जिला के बेटी नूपुर ठाकुर, छाया नाग अऊ नेहल ठाकुर ह राष्ट्रीय थाई बॉक्सिंग चौंपियनशिप म स्वर्ण पदक जीत के राज्य के नाम रोशन करे हे।   नक्सल प्रभावित क्षेत्र के ए होनहार खिलाड़ी मन ह कड़ा मेहनत अऊ लगन ले ये सिद्ध कर देहे हें के छत्तीसगढ़ के बेटी मन कोनो क्षेत्र म पीछू नइ हे। राज्य सरकार खेल प्रतिभा मन ल हर संभव सहयोग अऊ अवसर प्रदान करे बर प्रतिबद्ध हे, ताकि ओ मन राष्ट्रीय अऊ अंतरराष्ट्रीय स्तर म प्रदेश के गौरव बढ़ा सकंय।
जानबा हे के तेलंगाना के खैराताबाद म आयोजित 11वां राष्ट्रीय थाई बॉक्सिंग चौंपियनशिप म दंतेवाड़ा जिला के तीन बेटी मन ह स्वर्ण पदक जीतके खेल इतिहास म स्वर्णिम अध्याय जोड़े हें। तीन दिन के ए राष्ट्रीय प्रतियोगिता म देशभर के 8 राज्य मन ले लगभग 150 खिलाड़ी मन ह भाग लीन, जेमां छत्तीसगढ़ के 14 खिलाड़ी मन ह पदक हासिल करिन। एमां दंतेवाड़ा जिला के नूपुर ठाकुर, छाया नाग अऊ नेहल ठाकुर ह स्वर्ण पदक जीतके जिला के नाम रोशन करिन। जानबा हे कि नूपुर ठाकुर पहिली गोवा म आयोजित राष्ट्रीय चौंपियनशिप म घलोक स्वर्ण पदक जीते रहिस हे।
प्रतियोगिता म शानदार प्रदर्शन के बाद तीनों खिलाड़ी मन ह काली जिला के कलेक्टर श्री कुणाल दुदावत ले सौजन्य मुलाकात करिन। कलेक्टर श्री दुदावत ह खिलाड़ी मन ल शुभकामना देवत कहिन के दंतेवाड़ा के बेटी मन आज पूरा राज्य बर प्रेरणा बन गए हें। उमन विश्वास देवाइन के जिला प्रशासन खेल प्रतिभा मन ल हरसंभव प्रोत्साहन अऊ सहायता उपलब्‍ध करात रइही।