25 राज्य अउ छै देश के 1350 नर्तक जनजातीय कला संस्कृति के बिखेरहीं छटा
कई विधा म 43 नृत्य शैली मन के होही प्रदर्शन
रायपुर, राजधानी रायपुर के साइंस कालेज मैदान म राष्ट्रीय आदिवासी नृत्य महोत्सव के तीन दिवसीय आयोजन 27 ले 29 दिसम्बर तक करे जात हे। ये महोत्सव म देश के 25 राज्य अउ केन्द्रशासित प्रदेश के संगेच 6 देश के करीबन 1350 ले जादा भाग लेवइया अपन जनजातीय कला संस्कृति के प्रदर्शन करहीं।
ये महोत्सव म 39 जनजातीय नर्तक मन के दल कई ठन विधा मन म 43 ले जादा नृत्य शैली के प्रदर्शन करहीं। चार अलग-अलग नृत्य विधा म पहिली पुरस्कार पांच लाख रूपिया, दूसर पुरस्कार तीन लाख रूपिया, तीसर पुरस्कार दू लाख रूपिया अउ सांत्वना पुरस्कार पच्चीस हजार रूपिया रखे गए हे। भाग लेवईया मन के रूके, खाए, आए-जाए आदि के उचित व्यवस्था करे गए हे।
ये महोत्सव म अरूणाचल प्रदेश, असम, त्रिपुरा, मणिपुर, सिक्किम, उत्तराखण्ड, हिमाचल प्रदेश, उत्तरप्रदेश, बिहार, पश्चिम बंगाल, गुजरात, महाराष्ट्र, लददाख, जम्मू, मध्यप्रदेश, झारखण्ड, कर्नाटक, तमिलनाडु, केरल, आंध्रप्रदेश, तेलंगाना, अण्डमान निकोबार, उड़ीसा अऊ छत्तीसगढ़ आदि राज्य के 39 जनजातीय कलाकार 4 विधा म 43 ले जादा नृत्य शैली के प्रदर्शन करहीं। एकरे संग 6 आन देश जइसे युगांडा, मालदीव, बांग्लादेश, बेलारूस, श्रीलंका अउ थाईलैण्ड ले आवत 54 कलाकार गैर प्रतियोगी स्पर्धा म अपन नृत्य शैली के प्रदर्शन करहीं। राष्ट्रीय आदिवासी महोत्सव म भाग लेवइया लोक कलाकार मन के दल के आगमन होए लगे हे अऊ अरूणाचल प्रदेश के भाग लेवइया 24 दिसम्बर के रायपुर पहुंचत हे।
ये महोत्सव म भाग लेवइया रोज बिहनिया 9.00 बजे ले लेके रात 9.00 बजे तक अपन कला-संस्कृति के प्रदर्शन करहीं। अलग-अलग दिन म विजेता मन के चयन बर राष्ट्रीय स्तर के जनजातीय कला-विशेषज्ञ मन के जूरी गठित करे गए हे जेमां कर्नाटक, महाराष्ट्र, उत्तराखण्ड, झारखण्ड, गोवा, उड़ीसा, असम, सिक्किम अउर छत्तीसगढ़ के विशेषज्ञ सामिल करे गए हे।
राष्ट्रीय आदिवासी नृत्य महोत्सव छत्तीसगढ़ राज्य म पहली पइत आयोजित होवत हे। जेमां छत्तीसगढ़ अऊ आन राज्य मन के जनजातीय कला-संस्कृति के अनूठा प्रदर्शन देखे ल मिलही। संगेच छत्तीसगढ़ राज्य के बहुरंगी आदिवासी सांस्कृतिक परंपरा ले पूरा देश अऊ महोत्सव म आए आन देश परिचित हो सकही। छत्तीसगढ़ जनजातीय बाहुल्य राज्य हे जऊन राज्य के आबादी के 30.62 प्रतिशत हे अऊ राज्य म शासन कोति ले 42 जनजाति मन अधिसूचित हे। राष्ट्रीय आदिवासी महोत्सव ले राज्य के जनजातीय संस्कृति के राष्ट्रीय अऊ अंतर्राष्ट्रीय पहिचान बनही।
ये महोत्सव के तैयारी बर शासन के 15 ले जादा विभाग सरलग काम करत हे। जऊन सुरक्षा, आवास, आवागमन, चिकित्सा आदि प्रारंभिक व्यवस्था संग सौंपे गए जिम्मेदारी के निर्वहन करत हें। महोत्सव के मॉनीटरिंग खुद मुख्य सचिव अउर आन प्रशासनिक उच्च अधिकारी मन करत हें।
