- ट्राइबल डांस एरिया अऊ स्पीकर लाउंज के संगें-संग लाइव शोकेस एरिया, ट्राइबल इंस्पायर्ड एग्जीबिट, शिल्प-ग्राम अऊ फूड-एरिया के घलोक होही
- आयोजन बर रायपुर संग प्रदेश के सबो जिला मन म चलत हे भव्य तैयारी
रायपुर, रायपुर के साइंस कॉलेज मैदान म 28 अकटूबर ले शुरु होवइया राष्ट्रीय आदिवासी नृत्य महोत्सव के समय मनखे मन ल जनजातीय परंपरा के संग पहिरावा, गहना, शिल्प, डिजाइन अऊ खान-पान के बारे म घलोक विस्तार ले जनकारी प्राप्त करे के अवसर मिलही। ये महोत्सव म ट्राइबल डांस एरिया अऊ स्पीकर लाउंज के संगें-संग लाइव शोकेस एरिया, ट्राइबल इंस्पायर्ड एग्जीबिट, शिल्प-ग्राम अऊ फूड-एरिया के घलोक निर्माण करे जाही।
ट्राइबल डांस एरिया म 28 ले 30 अकटूबर तक राष्ट्रीय अऊ अंतर्राष्ट्रीय जनजाती मन कोति ले कई ठन जनजातीय नृत्य मन के प्रस्तुति देहे जाही। स्पीकर लाउंज म कला, संगीत, फिल्म, स्वास्थ्य, पर्यटन, खानपान संग कई ठन क्षेत्र मन म जनजातीय समुदाय मन ल अपन अनुभव ल साझा करे के अवसर मिलही। ये मंच के माध्यम ले ओ मन अपन समुदाय म होए विकास अऊ भविष्य के योजना मन के बारे म अपन विचार ल घलोक साझा कर पाहीं। लाइव शोकेस एरिया म आदिवासी मन के काम मन के प्रदर्शन करे जाही। मनखे जनजातीय कलाकार मन ले बातचीत करके उंखर कला अऊ शिल्प के बारे म विस्तृत जानकारी प्राप्त कर पाहीं। ट्राइबल इंस्पायर्ड एक्जिबिट म जनजातीय परंपरा मन ले प्रेरित परिधान, गहना, डिजाइन आदि ल प्रदर्शित करे जाही। शिल्प-ग्राम म आदिवासी हस्तशिल्प के प्रदर्शन अऊ विक्रय करे जाही। फूड एरिया म छत्तीसगढ़ के स्थानीय अऊ जनजातीय खान-पान के परंपरा मन ले मनखे परिचित होहीं।
राष्ट्रीय आदिवासी नृत्य महोत्सव के माध्यम ले शासन कोति ले जनजातीय समुदाय अऊ संगठन मन के बीच आपसी सहयोग बढ़ाए अऊ विकास के संभावना मन के पता लगाय बर घलोक पहल करे जात हे। ये महोत्सव के माध्यम ले ग्रामीण विकास, पर्यावरण अऊ पर्यटन ल बढ़ावा देहे के घलोक प्रयास करे जाही। नवा-रायपुर संग छत्तीसगढ़ के सबो जिला मन म राष्ट्रीय आदिवासी नृत्य महोत्सव के आयोजन के भव्य तैयारी करे जात हे। ये महोत्सव म हिस्सा लेने बर राज्य के सबो जिला मन के कलाकार मन कोति ले निरंतर अभ्यास करे जात हे। ए कलाकार मन के चयन बर जिला मन म कार्यक्रम घलोक आयोजित करे जात हे। साल 2019 म छत्तीसगढ़ म आयोजित राष्ट्रीय आदिवासी नृत्य महोत्सव म 25 राज्य मन अऊ 6 देश के जनजातीय कलाकार मन ह हिस्सा लेहे रहिन। ये पइत के महोत्सव म भागीदारी बर अब तक 8 देश ले सैद्धांतिक स्वीकृति प्राप्त हो गे हे। एमां युगांडा, नाइजीरिया, उज्बेकिस्तान, स्वाजीलैंड, माले, श्रीलंका, फिलिस्तीन अऊ सीरिया घलोक सामिल हे। कोरोना के सेती ले उत्पन्न परिस्थिति मन के सेती आए अंतराल के बाद अब साल 2021 म फेर पूरा भव्यता के संग आयोजन के तैयारी व्यापक स्तर म करे जात हे।
