छत्तीसगढ़ म तीसरईया पईत राष्ट्रीय आदिवासी नृत्य महोत्सव के होही भव्य आयोजन

सबो राज्य के मुख्यमंत्री अऊ जनप्रतिनिधि मन ल महोत्सव बर देहे जात हे नेवता
मुख्यमंत्री श्री भूपेश बघेल कोति ले नेउते ल पहुंचत हें जनप्रतिनिधि
छत्तीसगढ़ के 23वां राज्य स्थापना दिवस म आदिवासी नृत्य महोत्सव के आयोजन 1 ले 3 नवम्बर तक होही

रायपुर, छत्तीसगढ़ राज्य के गठन ल अवईया 1 नवम्बर के 22 बछर पूरा हो जाही। ये मौका म 23वां राज्य स्थापना दिवस के आयोजन करे जात हे। मुख्यमंत्री श्री भूपेश बघेल के अगुवई म छत्तीसगढ़ के आदिवासी संस्कृति अऊ सभ्यता ल अंतर्राष्ट्रीय स्तर म पहिचान देवाए के उदीम म तीसरईया पईत राष्ट्रीय आदिवासी नृत्य महोत्सव के भव्य अऊ गरिमामय आयोजन 1 ले 3 नवम्बर तक राजधानी रायपुर के साइंस कॉलेज मैदान म होही। मुख्यमंत्री श्री भूपेश बघेल के पहल म राज्य कोति ले मंत्री, संसदीय सचिव, विधायकगण संग आन जनप्रतिनिधि देश के सबो राज्य के मुख्यमंत्री, मंत्रीगण, जनप्रतिनिधि मन ल नेउते ल पहुंचत हें।
राज्योत्सव अऊ राष्ट्रीय आदिवासी नृत्य महोत्सव बर नेवतादेहे के कड़ी म राजस्थान के मुख्यमंत्री श्री अशोक गहलोत ल नेउते विधायक श्रीमती अनिता योगेन्द्र शर्मा अऊ डॉ. लक्ष्मी ध्रुव पहुंचिन। उमन श्री गहलोत ले मुलाकात करके ओ मन ल छत्तीसगढ़ के आदिवासी कलाकृति भेंट करत महोत्सव म सम्मिलित होए बर नेवता दीन। उहें असम के मुख्यमंत्री डॉ. हिमन्त बिश्व शर्मा ले मुलाकात करके संसदीय सचिव श्री पारसनाथ राजवाड़े ह उनला नेवता दीन। झारखंड के मुख्यमंत्री श्री हेमंत सोरेन ले विधायक श्री खेलसाय सिंह अऊ संसदीय सचिव श्रीमती रश्मि आशीष सिंह ह मुलाकात करिन। उमन मुख्यमंत्री श्री सोरेन ल रायपुर म आयोजित होववईया राष्ट्रीय आदिवासी नृत्य महोत्सव म सामिल होए बर मुख्यमंत्री श्री भूपेश बघेल कोति ले नेवता दीन। पुद्दूचेरी के मुख्यमंत्री श्री एन. रंगास्वामी ले संसदीय सचिव श्री इन्द्रशाह मंडावी अऊ विधायक श्री दलेश्वर साहू ह मुलाकात करके उमन ल नेवता दीन। सिक्किम के लोक निर्माण अऊ संस्कृति मंत्री श्री संदूप लेपचा ल नेउते पहुंचे संसदीय सचिव श्री कुंवरसिंह निषाद अऊ विधायक श्री भुनेश्वर बघेल ह आमंत्रण पत्र अऊ आदिवासी कलाकृति भेंट करिन। विधायक श्री सत्यनारायण शर्मा ह लक्षद्वीप के प्रशासक के प्रतिनिधि ले मुलाकात करके ओ मन ल आमंत्रित करिन।
इही कड़ी म संसदीय सचिव श्री गुरूदयाल बंजारे ह हरियाणा के मुख्यमंत्री श्री मनोहर लाल खट्टर ल, संसदीय सचिव श्री द्वारिकाधीश यादव ह त्रिपुरा के मुख्यमंत्री श्री मानिक साहा ल, संसदीय सचिव श्री शिशुपाल सोरी ह जम्मू-कश्मीर के मुख्य सचिव श्री अरूण मेहता ल अऊ छोटे वनोपज संघ के जीएम श्री एस. मनीवासगन ह तमिलनाडु सरकार के उद्योग मंत्री श्री थांगम थेन्नारासु ल नेवता देहे हें।