नवगुरुकुल : बालिका मन के शिक्षा अऊ संस्कार के संवर्धन के नवा पहल
रायगढ़, मुख्यमंत्री श्री विष्णु देव साय ह काली रायगढ़ जिला के प्रवास के समय खरसिया तहसील अंतर्गत ग्राम गढ़ उमरिया म नवगुरुकुल के शुभारंभ करिन। ए बेरा म उमन नवप्रवेशी छात्रा मनल लैपटॉप बांट के आगू बढ़े बर प्रेरित करिन अऊ ऊंखर उज्ज्वल भविष्य के शुभकामना दीन।
मुख्यमंत्री श्री साय ह नवगुरुकुल म स्थापित आधुनिक कंप्यूटर लैब के निरीक्षण करत गुरूजी मन ल निर्देश दीन के ओ मन बालिका मन ल उच्चस्तरीय शिक्षा अऊ मूल्य आधारित संस्कार देवंय ताकि उंखर भविष्य सुनहरा बनय।
मुख्यमंत्री श्री विष्णु देव साय ह शुभारंभ समारोह ल संबोधित करत सबले पहिली गणेशोत्सव, शिक्षक दिवस अऊ चक्रधर समारोह के बधाई दीन। उमन कहिन के एक गुरूजी राष्ट्र बनइया होथे, ते पाए के समाज म ओखर सर्वोच्च सम्मान होना चाही। मुख्यमंत्री श्री साय ह स्मरण कराइन के पाछू साल चक्रधर समारोह के समापन अवसर म रायगढ़ म प्रयास विद्यालय के उद्घाटन करे गए रहिस अऊ आज नवगुरुकुल के स्थापना ए कड़ी ल आगू बढ़ात हे। उमन ए अभिनव पहल बर वित्त मंत्री श्री ओ. पी. चौधरी, नवगुरुकुल के सह-संस्थापक सुश्री निधि अऊ उंखर टीम के प्रशंसा करिन अऊ कार्यक्रम म उपस्थित सबो बालिका मनल बधाई देके ऊंखर उज्ज्वल भविष्य के कामना करिन।
